Олон улсын хүүхдийн эрхийг хамгаалах өдрийг монголчууд үндэсний баярын хэмжээнд өргөн тэмдэглэлээ. Улаанбаатарчуудын хотын хувьд Сүхбаатарын талбайгаас өөр очих газар хомс тул тэнд л баяраа өнгөрөөв. Багачуудын хувьд ээж, аавтайгаа баяраа тэмдэглэх сайхан өдөр болсон бол улс төрчдийн хувьд энэ нь арай өөр утгатай байлаа. Сонгуулийн өмнөх сүүлийн баяр болохоор олны анхааралд өртөх сайхан боломж юм. Тиймээс Хүүхдийн баярын мэнд хүргэж, бэлэг гардуулсан шигээ сонгуулийн сурталчилгаагаа хийх олон нэр дэвшигчид байлаа. Тухайлбал Хан-Уул дүүрэгт нэр дэвшихээр бэлтгэлээ базааж буй УИХ-ын гишүүн Ц.Батбаяр өөрийн эзэмшилд байх “B” телевизийн “Томчуудаас асуух асуулт” нэвтрүүлэгт орж, бяцхан хүүтэй ярилцлаа.
- Асуулт : Та өөрийгөө хөөрхөн гэж боддог уу?
- Хариулт: Хүн болгон өөрийгөө хөөрхөн гэж боддог. Би хөөрхөн.
- Асуулт: Та том хүн үү?
- Хариулт: Ээждээ хүүхэд болохоос том хүн... гэх зэрэг урьдаас бэлдсэн эгдүүтэй асуултанд мөн л эгдүүтэй хариулав. Ц.Батбаяр гишүүн хүүхэд насныхаа дурсамжийг хувалцах зуураа өнгөрсөн жил олон хүүхдэд бэлэг өгч байснаа сануулав. Хууль, ажил хэрэг ярьдаг эрхэм гишүүн Хүүхдийн баярын дугаарт оролцож байгаа гэдгээ үе үе мартан, өөрийн өнгөрсөн дөрвөн жил хийсэн ажлаа бас хавчуулав. Нэр дэвшигчийн хувиар Хан-Уул дүүргийнхээ тухай ч баахан магтаж, сонгуулийн сурталчилгаа хийв. Том хүнтэй, том асуудал ярьсан хүү хөлс нь бурзайсаар арай гэж нэвтрүүлгийн цаг дуусгасан юм. Энэ мэт Хүүхдийн баяраар зурагтаар хүүхдээсээ олон гарсан улс төрчдийг хараад “сонгууль ч эхэлж дээ” гэж дуу алдах хүн олон байлаа. Хүүхдийн паркийн үнэтэй тоглоом дээр сууж чадаагүй хүүхдүүд Сүхбаатарын талбайд очиж баяраа тэмдэглэсэн. Харин Сүхбаатарын талбай дээр Нарантуул зах шиг хүүхдийн тоглоом задгай хүнс зарсан наймаачид, тэр хөл хөдөлгөөнд ядарч туйлдсан хүүхдүүд байсныг анзаарч харсан болов уу? Тэр үймээн дунд хүүхдүүд төөрч, эцэг эхчүүд нь микрофоноор зарлуулах гэж дарааллан зогссон байсныг мэдсэн болов уу?