Энэ удаагийн сонгуульд гадаадад амьдарч байгаа монголчууд анх удаа санал өгөх гэж байгаа. Тэдний саналыг хэрхэн авах тухай журам гарсан. Гадаадад амьдарч буй монголчуудаас санал авах ажлыг тухайн оронд суугаа Монголын Дипломат төлөөлөгчдийн газар зохион байгуулах юм. Өчигдрийн байдлаар 39 оронд амьдардаг 2500 гаруй хүн сонгуульд оролцохоор бүртгүүлсэн байна. Бүртгэлийн хугацаа өчигдрөөр дуусгавар болжээ. Гадаадад амьдарч буй монголчууд зөвхөн нам, эвслийн төлөө санал өгөх бөгөөд ирэх зургадугаар сарын 10-нд саналаа өгнө.
Тухайн Дипломат төлөөлөгчдийн газрын 172 хүн сонгуулийг зохион байгуулна. Гадаадаас яг хэдэн хүн санал өгөхөөр бүртгүүлсэн эцсийн тоо гарсны дараа ирэх сарын 6-нд саналын хуудсыг дугтуйд битүүмжлэн тухайн орон руу явуулах аж. Сонгогчдын саналыг авч хайрцганд битүүмжлэн СЕХ-нд ирүүлнэ. Саналын хуудсыг гадаадад тоолохгүй, Монголд авчирч СЕХ тоолох юм байна.
