Хорооны Засаг дарга эмэгтэй хуурамч материалд тамга даран баталгаажуулж оршин суугчдыг залилсан гэмт хэрэгт холбогджээ. Уг хэрэг Баянзүрх дүүргийн 26 дугаар хороонд гарсан байна. Тус хорооны Засаг дарга Б.Нарангаваа гэгч нь хуурамч материал ашигласан Д.Солонго гэгчид “Хурал болсон нь үнэн” гэсэн тодорхойлолт гаргаж өгснөөр 26 дугаар хороонд байрлах “Нарлаг өргөө” хотхоны иргэдэд 19 сая төгрөгийн хохирол учруулсан гэнэ.

“Нарлаг өргөө” хотхоны иргэдийн зүгээс  бүлэглэж хуурамч материал бүрдүүлж СӨХ байгуулснаар иргэд 19 сая төгрөгийн хохирол амсаад байна хэмээж байна.

Хамгийн гол нь, энэ хэрэгт хорооны Засаг дарга өөрөө холбогдсон нь асуудал дагуулаад байгаа аж. Тиймээс иргэд уг хэргийг Баянзүрх дүүргийн Цагдаагийн хэлтэст өргөдөл гарган хэрэг үүсгүүлэхээр гомдол гаргасан байгаа аж.

26-р хорооны нутагт байрлах “Нарлаг өргөө” хотхоныг “Эйч Эс Би” компанийн захиалгаар “Тэдмэнт” ХХК барьж, 2014 онд 2 дугаар сард ашиглалтад өгчээ.

2014 оны 11 дүгээр сарын 01-нд “Нарлаг өргөө-Найрсаг хотхон” нэртэй өдөрлөг зохион байгуулсан байна. Харин өдөрлөгийн дараа СӨХ байгуулах хурал болж, Удирдах зөвлөл, хяналтын зөвлөлийг иргэдэд хэлэлгүй дур мэдэн сонгон баталжээ.

Тэгээд зогсохгүй өдөрлөгийг сонирхон ирсэн иргэдийн зургийг авч, СӨХ-ны хуралд оролцсон иргэд хэмээн холбогдох материалд хавсарган, “Нарлаг өргөө” байрны айлуудаар явж тэр зургийг харуулан СӨХ байгуулахаар хуралдаж оролцсон иргэд хэмээн танилцуулан, гарын үсгийг нь авсан байдаг.   Гэтэл энэ хуурамч материалыг 26-р хорооны Засаг дарга Б.Нарангаваа “Хурал болсон нь үнэн”  гэсэн тодорхойлолт гаргаж өгч баталгаажуулснаар хуурамч СӨХ байгуулагдан “Нарлаг өргөө” хотхоны оршин суугчдыг одоогийн байдлаар 19 сая төгрөгөөр хохироогоод байна.

Д.Ундрах /24tsag.mn/