Монголын тэргүүлэгч esports баг болох The MongolZ загварын сэтгүүл Velin-ийн шинэ дугаарын нүүр хуудсанд гарахтай зэрэгцэн онцгой ярилцлага өглөө. Багийн тоглогчид болох Blitz буюу Б.Гарьдмагнай, Techno4k буюу М.Содбаяр, Mzinho буюу Б.Аюуш, 910 буюу Б.Өсөхбаяр, Senzu буюу Н.Азбаяр нар дэлхийн тайзнаа амжилтад хүрсэн нууц жороо хуваалцжээ.
The MongolZ бол Монгол улсын дүр төрхийг олон улсын тавцанд цогцлоож буй баг билээ. Тэдний амжилтын ачаар дэлхийн сая сая и-спорт сонирхогч Монгол орныг танин мэдэж, дэмжих болжээ. Өнгөрсөн жил тус баг MESA Nomadic Masters Spring 2024, YaLLa Compass 2024, Thunderpick World Championship 2024 зэрэг томоохон тэмцээнүүдийн тэргүүн байр эзэлсэн.
2025 оны зун The MongolZ баг олон улсын хэмжээний том тэмцээн болох Esports World Cup 2025-д түрүүлж, намар нь Valve болон HLTV-ийн чансааг тэргүүлэн дэлхийн №1 баг болж чадсан. Энэ жилийн анхны мэйжор BLAST.tv Austin Major 2025-д мөнгөн медаль хүртсэн бол одоо улирлын хоёр дахь томоохон тэмцээн StarLadder Budapest Major 2025-д өрсөлдөж байна.
Тоглогчид амжилтын нууцын нэг хэсэг нь гол ивээн тэтгэгч 1xBet-ийн дэмжлэгтэйгээр хийгддэг өдөр тутмын хатуу давтлага, бүүткемпээс гадна багийн дотоод уур амьсгал гэж үздэг. Бие биенээ ойлгож, халамжлах нь олон улсын түвшний сэтгэлзүйн дарамтыг давж, нэг хүн шиг тоглох боломж олгодог гэж хэлдэг. Түүнчлэн The MongolZ-ийн тоглогчдын ихэнх нь багт нэгдэхээсээ өмнө хэдийн танил байсан нь тоглолтын уур амьсгалыг улам сайжруулдаг. Mzinho болон Senzu бага наснаасаа найзалсан бол Blitz ба Techno4k нар нэгэн үед улс аймгийн чанартай шатрын тэмцээнүүдэд хамт өрсөлдөж явжээ.
Тэд Монголын хөгжөөн дэмжигчдийн асар том дэмжлэгийг амжилтын гол хүчин зүйлсийн нэг гэж онцолдог. Чухал тоглолтын өдрүүдэд Улаанбаатар болон улсын томоохон хотуудад мянга мянган хүн фанзонуудыг дүүргэн хайртай багаа урамшуулдаг. Мөн өнгөрсөн жил Улаанбаатар хотод The MongolZ-д зориулсан том хэмжээний ханын зураг 1xBet Mongol-ын санаачилгаар бүтээгдсэн нь олон нийтийн бахархлыг улам нэмэгдүүлсэн.
Олон улсын өрсөлдөөнтэй дүүрэн шахуу хуваарийн дунд ч The MongolZ баг хөгжөөн дэмжигчдээ мартаагүй. Энэ хавар багийн бүрэлдэхүүн бүгдээрээ Улаанбаатар хотноо зохион байгуулагдсан MESA Nomadic Masters Spring 2025 арга хэмжээнд хүрэлцэн ирж, The MongolZ-ийн өмнөх үеийн домогт ахмадууд болох Zilkenberg, Tsogoo, Machinegun, Otgoo, Ncl нартай шоу тоглолт хийж, монгол фэнүүддээ хүндэтгэл үзүүлсэн юм.
Эх сурвалж: The Mongolz багийн инстаграм хаяг (https://www.instagram.com/mongolz.gg/)
