Нэр хүнд, цар хүрээгээрээ Оскарын дараа жагсдаг Каннын кино наадамд жинхэнэ шилдэг бүтээлүүд, шилдэг уран бүтээлчид оролцдог билээ. Тэгвэл энэхүү Францын Канн хотод жил бүр болдог олон улсын кино  наадам 65 дахь удаагаа болж өндөрлөсөн юм. Дэлхийн шилдэг киночдыг нэг дор цуглуулж, кино сонирхогчдын анхаарлыг нэгэн цэгт төвлөрүүлдэг тус наадамд анх удаа Монгол кино оролцож олны  хүртээл болжээ.

    Наадмын хүрээнд киногоо үзүүлэх боломжийг бусад орны уран бүтээлчдэд олгох, тэдний хамтын ажиллагааг дэмжих арга хэмжээ болдог аж. Энэ жил Каннын наадмыг зохион байгуулах хорооны шалгуурыг давсан 150 гаруй орны киночид бүтээлээ 20 гаруй театруудад гаргасан байна. Тэдгээр дотор Монгол Улсаас “Дээд гэгээн пикчерс”-ийн “Богд хаан” кино багтжээ. “Богд хаан” киног Каннын “Gray D’Albion” зочид буудлын кино театрт гаргасан бөгөөд үзэгчид манай уран бүтээлчдийн ур чадварт сэтгэл хангалуун үлдсэн байна. Дашрамд сонирхуулахад, ”Богд хаан”  киног  үзээд АНУ, Энэтхэг, БНСУ, Францын продакшн, телевизүүд худалдаж авах санал тавьсан төдийгүй  олон улсын хэд хэдэн наадамд оролцох урилга өгсөн ажээ.