Энэ сарын 2-20-ны дотор манай улсаас 317 цэргийн алба хаагч Хойд Судан, Өмнөд Судан болон Афганистан улсуудад энхийг дэмжих ажиллагаанд үүрэг гүйцэтгэхээр явна.
    Энэ сарын 2-20-ны дотор манай улсаас 317 цэргийн алба хаагч Хойд Судан, Өмнөд Судан болон Афганистан улсуудад энхийг дэмжих ажиллагаанд үүрэг гүйцэтгэхээр явна. Тэднийг явсан хойгуур сонгууль болох учраас Сонгуулийн Ерөнхий хорооноос урьдчилан сонгууль авах боломжгүй гэжээ.
    Иймд Зэвсэгт хүчний Жанжин Штабаас Улсын Их Хурлын сонгуульд оролцох, Үндсэн хуульд заасан сонгох эрхийг нь эдлүүлэх боломжийг хангаж өгөөгүй хэмээн Хүний эрхийн Үндэсний Комисст хандаж албан бичиг хүргүүлсэн байна.
    Уг асуудлыг Хүний эрхийн Үндэсний Комиссын хурлаар авч хэлэлцээд, “Сонгууль зарласан, сонгуульд оролцох нам, мөн нэр дэвшигчид тодорхой болсон байхад эдгээр албан хаагчид сонгох эрхээ эдлэх бүрэн боломжтой. Гэвч ямар ч шалтгаантай байсан саналаа урьдчилж өгөхийг хуулиар хаасан байгаа тул энэ удаа эдгээр иргэдийн сонгох эрхийг эдлүүлэх боломжгүй болсонд харамсаж байгаагаа илэрхийлье. Цаашид ийм төрлийн зөрчлийг арилгах эрх зүйн зохицуулалт бий болгох талаар Хүний эрхийн Үндэсний комисс өөрөөсөө шалтгаалах бүхнийг хийх болно” хэмээн хариу өгчээ.