Өнөөдөр 16 цаг 30 минутаас МАХН-ын төв байр цагаан ордонд МАХН-ын дарга Н.Энхбаяр 2012 оны УИХ-ын сонгуульд жагсаалтаар нэр дэвшиж байгаа 24 хүнд мандатыг нь гардуулж өгөх ёслолын ажиллагаа боллоо. Ёслолын ажиллагаанд МАХН-ын дарга Н.Энхбаяр, дэд дарга, УИХ-ын гишүүн Д.Тэрбишдагва, МАХН-ын НБД, УИХ-ын гишүүн О.Чулуунбат, Академич С.Нарангэрэл тэргүүтэй 60 гаруй хүн оролцлоо.
Ёслолын ажиллагааг нээж МАХН-ын дэд дарга Д.Тэрбишдагва “Бид УИХ-ын сонгуульд жагсаалтаар нэр дэвшиж байгаа хүмүүстээ сонгохдоо хамгийн нэр хүндтэй, нийгэмд танигдсан, улс эх орныхоо төлөө бүтээн байгуулалтын төлөө өөрийнхөө оюун санаа аж амьдралаа зориулсан тэргүүний хүмүүсээ оруулсан. Харамсалтай нь МАХН-МҮАН-ын “Шударга ёс” эвслээс нэр дэвшиж байгаа хүмүүсийн маань заримыг нь СЕХ бүртгэж авсангүй. Үүнээс үүдэж бид Монгол улсад хууль ёс үйлчилж байна уу үгүй гэдгийг мэдэх шаардлагатай учирсан. СЕХ хэдийгээр хууль зөрчиж 4 нэр дэвшигчийг маань хассан ч гэлээ бид үлдсэн 24 нэр дэвшигчдээ мандатыг олгож байна. Монгол улсад хууль ёс гэж байдаг юм бол бид цаашдаа нэр хүндтэй 4 хүнээ жагсаалтанд оруулахаар тэмцэх болно” гэв.
Ингээд МАХН-ын дарга Н.Энхбаяр, Д.Тэрбишдагва нар 24 нэр дэвшигчдэдээ баяр хүргэж мандатыг гардуулан өглөө.
Б.Чимэг
