Ээлжит бус чуулганыг бөөн сүр, дуулиан болж хуралдуулсан зорилго нь Үндсэн хуулийн цэцийн дарга Ж.Амарсанааг огцруулах л зорилготой байсан гэдэг нь батлагдлаа. УИХ-ын дарга З.Энхболд энэ сарын 15-25-ны хооронд ээлжит бус чуулганы хуралдааныг хуралдуулах захирамж гаргасан. Гэтэл МАН болон “Шударга ёс” эвслийн бойкотоос болж хуралдаж чадахгүй байсаар өнгөрсөн баасан гаригийг хүргэсэн ээлжит бус чуулганыг тухайн өдрийн 10.45 цагт нээгээд оройн 21.00 цаг орчимд хаав.  

Арай хийн ирц бүрдэж ээлжит бус чуулганыг нээсэн ч тэр өдрөө хааж орхисон нь хуралдааны зорилгыг бүдгэрүүлэхээс гадна манай улс төрчдийн албан тушаалын “зодоон”, эрх ашгийн төлөөх тэмцэлд ялахын тулд яаж сүрхий ажилладагийг харуулав. Уг нь УИХ-ын дарга З.Энхболд ээлжит бус хуралдааныг хуралдуулах шаардлагыг хэлэхдээ “Улс орны эдийн засаг, эрх ашигт нэн хэрэгтэй хуулиудыг ээлжит бус чуулганаар хэлэлцэнэ. Энэхүү ээлжит бус чуулган нь татварын шинэчлэлийг гүнзгийрүүлэхэд онцгой анхаарал хандуулах болно” гэх мэтээр ярьж байлаа.

Гэтэл энэ эцэстээ юун татварын шинэчлэлийг гүнзгийрүүлэх болж хувирав. Нийгэм, эдийн засагт чухал ач холбогдолтой хуулиудаа баталъя гэхэд МАН, МАХН-ынхан орж ирэхгүй улс орны хөгжлөөс хойш татаж байна хэмээн уйлагнаж суусан нь зүгээр л жүжиг байж. Уг нь ээлжит бус чуулганы хуралдаанаар 25 асуудлыг хэлэлцэнэ гэж төлөвлөсөн байсан. Гэтэл хэдэн хуулийн төслийн эцсийн найруулгыг сонсоод араас нь Үндсэн хуулийн Цэцийн дарга Ж.Амарсанааг огцруулах асуудлыг хэлэлцээд л  хуралдааныг хаав. Бас болоогүй эдгээрийн хажуугаар УИХ-ын Аюулгүй байдал, гадаад бодлогын байнгын хороо, Төсвийн байнгын хороо, Хууль зүйн байнгын хороо хуралдаж, зарим нэг хуулийн төслүүдийг хэлэлцэн ажил хийсэн болж харагдав.

Энэ бол манай хууль тогтоох эрх мэдэл бүхий дээд байгууллагын ажлаа явуулж буйн тод жишээ. УИХ-д олонх нь хэн, нэгэн даргыг огцруулах гэж ээлжит бус чуулган зарлаж хуралдуулдаг. Цөөнх нь түүнд нь суухгүй гэж гүрийдэг. Албан тушаалаар хурал барьцаалдаг ийм л нэг УИХ-тай болж. Сүүлийн үед хэн, нэгэн албан тушаалтныг халж, солих гэж л УИХ ажилладаг болоод байна уу даа гэх ойлголтыг ард түмэн авч байна.  Уг нь Татварын хуулийн шинэчилсэн найруулгын төслийг яаралтай батлах шаардлага байгааг мэргэжлийнхэн ярьж байгаа. Гэтэл УИХ-ын гишүүд уг хуулийг хэлэлцэж батлахын оронд Үндсэн хуулийн цэцийн даргыг огцруулчихаад л залхуурав. Хууль эрх зүйн шинэчлэлтэй холбоотой олон төсөл мөн л Татварын багц хуулиудын нэгэн адил хаврын чуулган руу шилжив.

Энэ бүгд эцэстээ нэг л зүйлийг хэлж байгаа нь ээлжит бус чуулганы зорилго нь зөвхөн Үндсэн хуулийн цэцийн даргыг чөлөөлөх л байж. Харин бусад 24 асуудал зүгээр л жийрэг болж.

Т.Энхэлээ