Эрх баригчид амлалтаа биелүүлэх нэрээр энд, тэндээс мөнгө хайсан арга хэт явцуурчээ.

    Эрх баригчид амлалтаа биелүүлэх нэрээр энд, тэндээс мөнгө хайсан арга хэт явцуурчээ. Сангийн яамны Төсвийн бодлогын газрын дарга, Хөгжлийн банкны ТУЗ-ын дарга Б.Батжаргал ийм үйлдлийг бодитоор мэддэг хүний хувьд ажлаа өгөх болсон байна. Тэрээр ажлаас гарах болсон шалтгаанаа тоочиж  “Сангийн яамныхандаа” гэсэн захидал бичин дотоод сүлжээгээрээ тараажээ. Сангийн яаманд 17 жил ажилласан, Монгол Улсын төсвийн бодлогыг сүүлийн хэдэн жилд тодорхойлолцож яваа энэ залуугийн ажлаас гарах шалтгаан нь эрх баригчдын бэлэн мөнгөний амлалттай шууд холбоотой гэдэг нь захидалд тодорхой байна. 2008 онд МАН иргэн бүрт 1,5 сая төгрөг өгнө хэмээн амалсан. Тэд амлалтаа биелүүлээгүй дараагийн сонгуульдаа орох гэж байгаа билээ.

   Эхний ээлжинд ахмад настан, хөгжлийн бэрхшээлтэй иргэдэд нэг сая төгрөг олгохоор болж 330 мянган төгрөг өгч эхэлсэн. Харин үлдэгдэл 670 мянган төгрөгийн эх үүсвэр олдохгүй байгаа тухай хэвлэлээр бичсээр байна. Энэ мөнгийг тараахын тулд 250 тэрбум төгрөг шаардлагатай байгаа юм. Эрх баригч МАН энэ мөнгийг сонгуулийн өмнө тараахаар улайрч, эх орныхоо юуг ч зарж үрж магадгүйд хүрээд байгаа аж. Эх үүсвэрийг бүрдүүлэхийн тулд “Эрдэнэт”-ийн зэсийг барьцаалж мөнгө зээлэх, Тавантолгойг барьцаалж Хятадаас мөнгө зээлэх, төмөр замын төслийг хэрэгжүүлэхээр зэхэж буй Хөгжлийн банкны мөнгийг авч 670 мянган төгрөгийг олгох гэж байгаа тухай мэдээлэл гарсан. Б.Батжаргалын захидалд бичсэнээр бол дээрх мэдээллүүд үнэний ортой байжээ. Дарга нар буюу эрх баригч МАН-ынхан Б.Батжаргалд Хүний хөгжлийн санд  мөнгө бүрдүүлэх үүрэг даалгавар өгчээ.
   Тэрээр хууль зөрчин даалгавар биелүүлэх боломжгүй учир ажлаа өгөх болсноо захидалдаа бичсэн байна. Тэрээр захидалдаа “Эрдэнэс Тавантолгой" компани 2012 оны Хүний хөгжлийн сангийн төсвийн хуулийн дагуу нийт 312 тэрбум төгрөгийн татварын урьдчилгаа төлбөрийг Хүний хөгжлийн санд төвлөрүүлж, түүгээр ахмад настан, хөгжлийн бэрхшээлтэй хүмүүст нэг сая төгрөг тараах естой боловч өнөөг хүртэл уг мөнгийг төвлөрүүлээгүй.
   Төвлөрүүлэх чиглэлээр тус компани ихээхэн хичээн зүтгэж, гадны санхүүгийн томоохон хөрөнгө оруулалтын банкуудтай хэрхэн хамтран ажиллаж байгаа талаарх мэдээллийг би тогтмол авч байсан юм. Тус банк нь "Эрдэнэс Тавантолгой" компани өмнөх жилүүдэд Хятадын төрийн өмчийн “Чалко” компаниас 350 сая ам.долларын нүүрсний урьдчилгаа төлбөр авч дийлэнхийг нь Хүний хөгжлийн санд шилжүүлснийг мэдэж байсан учраас "Эрдэнэс Тавантолгой" компанид зээл олгохдоо зээлээ Монголд оруулж ирэхгүй байх, улмаар зөвхөн гадаад төлбөр хийх нөхцөлтэй зээл олгох боломжтойгоо мэдэгдсэн байсан. Үүнээс гадна “Эрдэнэс Тавантолгой" компанийн санхүүгийн байдал төдийлөн сайнгүй байгаа мэдээллийг би сонин хэвлэлээс авч байсан.

10 гаруй хоногийн өмнө "Эрдэнэс Тавантолгой" компаниас 250 тэрбум төгрөгийн эээл авах хүсэлтийг Хөгжлийн банкинд ирүүлсэн. (Хүний хөгжлийн сангаас ахмад настан, хөгжлийн бэрхшээлтэй хүмүүст олгоход дутуу байгаа хөрөнгө 250 тэрбум төгрөг байгаа). Үүнтэй ээрэгцэн удирдлагуудаас энэ зээлийг хурдан олгохыг шаардсан. Байгаа бүх нөхцөл байдлыг тайлбарласан боловч тайлбар сонсохыг хүсээгүй. Зээл хүсэгч бүрдүүлэх ёстой материалуудаа бүрдүүлээгүй бас зээлийн мөнгийг төмөр замын төсөлд бус буцаагаад Хүний хөгжлийн санд төвлөрүүлэн тараах магадлал өндөр байгаа тул би өгсөн үүргийг биелүүлэх боломжгүй бөгөөд цаашид ингэж ажиллах боломжгүй гэдгээ мэдэгдээд өргөдлөө өгсөн юм” гэжээ. Хэрэв энэхүү гадаад зээлийг Хүний хөгжлийн санд оруулбал Хөгжлийн банкинд итгэх гадаад. дотоодын хөрөнгө оруулагчид болон олон нийтийн итгэл буурах эрсдэлтэй юм байна. Мөн инфляци улам хөөрөгдөнө. Ийм явцуу аргаар эрх баригчид амлалтаа хэрэгжүүлэхийг хичээж байна. Хэрэв ийм дээрээ тулвал сонгуулийн маргааш Монгол Улс хэдэн тэрбумын өртэй, гадаадад нэр хүндээ алдсан, хамаг баялгаа барьцаалсан, өргөн хэрэглээний барааны үнэ тэнгэрт хадсан, иргэд улам ядуурсан амьдрал үргэлжлэх нь.