“Ид сааль сүүний цагаар саалиа орхиод үхчихдэг хүнийг ямар эхнэр гэдэг юм”  гээд эр нөхөр нь уйлаад сууж байсан тухай амнаас ам дамжин яригддаг даа. Яагаад энэ тухай дурсаад байна вэ гэхээр Хөгжлийн банкны ТУЗ-ийн дарга, Сангийн яамны төсвийн бодлогын газрын дарга манайдаа л нэг номер шахуу эдийн засагч хэмээн тодорхойлогддог Д.Батжаргал гэнэт өргөдлөө өгч халагдахаар болжээ.  Түүний орны хүнийг авахаар  сонгон шалгаруулалт ч зарласан аж.
Тэр нөхөр эрх баригч МАН-ын дарга нарын дарамтыг тэсээгүй тул ёстой л сааль сүүний цагаар үхнэ гэгчээр ажлаа өгөхөөр шийджээ.  Өчигдөрхөн тэрээр Сангийн яамныхаа хамт олонтой салах ёс гүйцэтгэн хэдэн хуудас захидал илгээсэн тухай ч мэдээлэл тархав.  Тэрээр энэ яамандаа, төрийн албандаа 17 жил хүчин зүтгэсэн жинхэнэ төрийн хүн. Тиймээс ийнхүү хамгийн эгзэгтэй ээдрээтэй үед албан тушаалаа өгөх болсон шалтгаанаа өөрөө тайлбарлах ёстой гэсэн үүргээ ухамсарлан захидал бичсэн бололтой.
  Түүний бичсэн захидлаас төрийн албаны дарамт шахалт нэвт мэдрэгдэж, чин шударгаар ажиллах боломжгүй гэдгийг баталгаажуулж байгаа юм.
Хөгжлийн банк өөрийнхөө үүргийн дагуу Засгийн газрын тогтоолоор төмөр замын суурь дэд бүтцийг эзэмших эрхтэй Эрдэнэс Таван толгой компанид 399 тэрбум төгрөг зээлдүүлэх дааргавар авчээ. Гэвч Хөгжлийн банкны ТУЗ үүргийнхээ дагуу зээл гаргахаас өмнө энэ бүхнийг судалж эхэлсэн байна. Саяхны мэдээгээр шинэ төмөр замыг барих ажлыг  хувийн компаниудад Концессын гэрээгээр даалгасан байсан. 24 жилийн дараа улс төмөр замаа эзэмших эрхтэй байгуулсан концессын гэрээ байгуулснаар “Энержи Ресурс”,  “Дорнын төмөр зам”, “Монголиантранс Лайн” компаниуд ажлаа эхэлснээ албан ёсоор зарласан. Гэвч үүнд “Эрдэнэс Таван толгой” ямар  үүрэг оролцоотой байх нь өнөөг хэр нь тодорхойгүй байгаа юм. Тиймээс мөнгө өгөх боломжгүй гэсэн дүгнэлт гаргасан бололтой.
  Эрдэнэс таван толгой компани нь Төсвийн хуулийнхаа дагуу Хүний хөгжил санд энэ жилдээ 312 тэрбум төгрөг төвлөрүүлэх ёстой. Гэвч өнөөг хүртэл ажил нь тодорхой болоогүй хувьцаагаа гадны зах зээлд гаргаагүй байгаа зэргээс төвлөрүүлэх мөнгөн дүндээ хүрч чадахгүй байгааг хүн бүр мэднэ. Гадны банкуудаас хамтран ажиллахыг хүссэн ч Хүний хөгжил санд мөнгө шилжүүлнэ гэхээр дуртай толгой дохих нь олдохгүй байгаа гэнэ. Иймээс ацан шалаан орсон Эрдэнэс Таван толгой  Хөгжлийн банкнаас 250 тэрбум төгрөгийн зээл авах хүсэлтээ 10-аад хоногийн өмнө илгээсэн аж.  Хөгжлийн банкны зүгээс зээл хүсэгчийн материал бүрэн бус, энэ мөнгийг хэрхэн юунд зарцуулах тодорхой биш байна гэсэн шалтгаанаар буцаасан гэнэ. Түүгээр зогсохгүй энэ мөнгийг өгөхгүй гэдгээ албан ёсоор хэлснийхээ төлөө Д.Батжаргал ажлаасаа халагдах өргөдлөө өгөх шаардлагатай болсон аж.
  
  Ямар ч байсан Монголын Хөгжлийн банк ирээдүй рүүгээ чиглэсэн томоохон төслүүдээ санхүүжүүлэх үүрэгтэй гэдгээ ухамсарлан гадныханд ойлгуулж ятгаж явсаар олж ирсэн 600-гаад сая ам.доллараа өгөхгүй, бэлэн мөнгө болгон тараалгахгүй гэсэндээ нэлээн гүрийж. Д.Батжаргал ТУЗ-ийн даргаар ажиллаж байгаа цагт өдрийн 98 мянган ам.долларын хүүтэй ч мөнгө авдартаа л хадгалагдаж байсан аж. Тэгвэл Д.Батжаргал өргөдлөө өгсөн үетэй давхцаад ахмад настан хөгжлийн бэрхшээлтэй иргэнд олгох сая төгрөгийн үлдэгдэл 670 мянган төгрөгийн 330 мянгыг нь олгох болсныг хэн хэрхэн тайлбарлах вэ.
    Хэдийгээр дээрх мэдээлэл нь одоогоор яг батлагдсан үнэн биш ч үгүй ээ гээд үгүйсгэх боломжгүй зүйл гэдэг нь тодорхой байна. Эрдэнэс Таван толгой компани Хөгжлийн банкнаас зээл хүссэн нь үнэн. Гэхдээ хүссэн мөнгөөрөө юу хийх ямар бүтээн байгуулалтыг нь дэмжих нь огт тодорхойгүй хэвээр байгаа юм. Сонгууль гэсэн үгээр халхавч хийгээд өнөөдөр Сангийн яам болоод Хөгжлийн банк, Эрдэнэс таван толгойг  төлөөлөөд хэвлэлд мэдээлэл өгөх хүн алга. Яагаад гэвэл санал хураахад зургаахан хоног үлджээ.
 Хөгжлийн банкны ТУЗ-ийн дарга Д.Батжаргал ямар ч байсан хамт олондоо хандаж захидал бичсэн бололтой.