Сүүлийн жилүүдэд улаанбурханы өвчлөл газар авч, нялхсын алтан амийг авч одсоор байгаа билээ. Гамшгийн хэмжээнд хүрээд буй энэхүү өвчинтэй тэмцэж, эмчилгээнд шаардагдах тоног төхөөрөмжийг худалдан авах хандивын аяныг иргэд, олон нийт хэдийнэ эхлүүлсэн. Тэгвэл зарим иргэний сайн үйлсийн аян хил гаалийн ажилчдын хүнд суртлын улмаас хүрэх газраа хүрч чадахгүй гацжээ.

Тодруулбал, одоогоос 14 хоногийн өмнө Ж.Эрхэмбаяр гэх иргэний санаачлагыг дэмжиж, Австри улсад ажиллаж амьдардаг монголчууд улаанбурханы өвчлөлийн үед хэрэглэдэг утлагын 12 ширхэг аппарат илгээжээ. Гэтэл Буянт-Ухаа дахь гаалийн ажилчид нь элдэв бичиг барит нэхэж, улмаар 10 гаруй хоног аппаратуудыг хил дээр байлгаж байгаа аж.

Энэ талаар Ж.Эрхэмбаяртай холбогдож тодруулахад “Буянт-Ухаагийн гаалийн байцаагчид элдэв бичиг баримт нэхэж заваарсаар байтал аппаратууд хүрэх газраа хүчр чадахгүй байна. Өөрөөр хэлбэл, Буянт-Ухаа дахь гаалийн хүнд сурталаас болоод 10 хоногийн өмнө Австрийн монголчуудаас хандивласан 12 ширхэг утлагын аппаратаа өнөөдөр ч авч чадахгүй байна. Тайлбар нь Эрүүл мэндийн яамнаас лиценз авах шаардлагатай бараа /ЭМЯ нь хувь хүнд лиценз өгөхгүй/ гэнэ. Энэ 12 ширхэг утлагын аппарат энэ хугацаанд олон хүүхдийг амийг аврах ёстой байсан. Буянт-Ухаа дахь гааль дахь асуудал маань Төрийн байгууллагуудын уялдаа холбоогүйгээс болоод эмгэнэлт хошин жүжиг болоод байна даа.

Өнөөдөр нэг компани тусгай зөвшөөрөлөө ашиглуулахаар болоод гааль дээр очтол бүрдүүлэлтийн байцаагч нар нь лиценз шаардлагагүй тусгай зөвшөөрөлөөр авч болно гэдэг гэтэл хяналтын байцаагч болоод дарга нар нь шаардлагатай гээд ЭМЯ-ны лиценз олгодог төвийн даргатай холбогдохоор лиценз шаарддаг тоног төхөөрөмж учраас лиценз аваа гэдэг. Би тус төвийн мэргэжилтэн болоод уг төхөөрөмжийг байнга оруулдаг компаниас асуухаар шаардлагагүй гэдэг. Нэг лицензийн цаас нэхээд нааш цааш нь явуулж байна. Гэтэл ХӨСҮТ болон орон нутгийн эмнэлгүүдээс аппаратаа нэхээд байдаг.

Дээрх 12 аппаратыг улаанбурханы өвчлөл өндөр байгаа зургаан аймагт хувиарлана гэсэн. Тухайлбал, Дорнод, Баян-Өлгий, Өвөрхангай, Сэлэнгэ зэрэг аймгуудад халдвартын эмч нар өөрсдөө хувиарлах юм билээ. Тэгээд л аппаратаа явуулсан уу, ирж байна уу гээд байнга асууж байна. Ийм байдалтай л явж байна даа” гэв.

Мөн энэ асуудлаар ЭМС-ын Төрийн нарийн бичгийн дарга Ламбаад хандсан ч тэрбээр "Эргээд хариу хэлнэ" гэсэн хариулт өгчээ. Яг өнөөдрийн нөхцөл байдлаар бол эргээд хариу хэлнэ гэдэг хариулт байхгүй. Гагцхүү газар дээр нь шийдэх цаг гэтэл хүүхдийн амь насыг юман чинээ тоохгүй байгаа сайд дарга нар эргээд хариу өгнө гэдэг үгээр ам таглаж суух цаг мөн үү. ЭМЯ энэ аппаратыг авч өгөхгүй байгаагаас хүүхдүүд цөөхөн аппаратаар ээлжилж хэрэглэдэг гэтэл үнэгүй өгч байгаа аппаратыг асуудал гаргалгүй алгаа тосоод авч чадахгүй, иргэдийнхээ эрүүл мэнд амь насыг хөсөр хаяж буй ЭМС-ын яаманд хариуцлага тооцох хэрэгтэй гэдгийг ч хэлэх хүн олон байгаа юм.