Дорнод аймагт МАН-аас УИХ-ын сонгуульд нэр дэвшиж байгаа Нийгмийн хамгаалал, хөдөлмөрийн дэд сайд Н.Номтойбаяр сонгуулийн сурталчилгааныхаа хажуугаар ан, ав хийсэн нь шуугиан дэгдээгээд байна. Тэрбээр Улаан номд орсон хүрэн баавгайг дурантай буугаар хөнөөсөн зургаа фэйсбүүк хуудастаа тавьсан нь олон хүний дургүйцлийг хүргэжээ. Хэдийгээр Н.Номтойбаяр зургаа даруй устгасан ч ан хийсэн зураг нь нийтийн сайтуудаар хурдацтай тархжээ.

   Монгол улс Улаан номд орсон амьтдыг агнах квотыг жил болгон тогтоодог ч одоогоор хүрэн баавгайг агнах зөвшөөрөл өгөөгүй байгаа аж. Энэ талаар БОАЖЯ-ны сайд асан Л.Гансүхээс тодруулахад хүрэн баавгай нь ховордсон ан амьтдын "улаан данс"-нд ордог аж. Тиймээс энэ амьтныг зөвхөн судалгаа, шинжилгээний зориулалтаар агнахыг зөвшөөрдөг. Гэхдээ зөвшөөрлийг Засгийн газрын хурлаар хэлэлцүүлж байж шийддэг гэлээ. Харин түүний хэлснээр энэ жил Засгийн газар нэг ч хүрэн баавгай агнах зөвшөөрөл олгоогүй гэсэн юм.
  Н.Номтойбаяр дэд сайд болохоосоо өмнө хөрөнгө бэлээрээ олны ярианы сэдэв болдог байсан. Дэд сайд болсныхоо дараа ч "мөнгөний хүчээр гарч ирсэн", "ажлаа мэддэггүй дэд сайд" гэх зэрэг шүүмжлэлд өртөөд байсан. Харин энэ удаа шүүмжлэлээс илүү асуудалтай тулгараад байна. Н.Номтойбаярыг Улаан номд орсон, тоо толгой нь буурсаар байгаа хүрэн баавгайг хууль бусаар агнасан гэх хэргийг шалгахыг БОАЖЯ болон холбогдох албан тушаалтнуудаас хүсчээ.