Британийн "Excalibur Almaz" компани 2015 он гэхэд Сар руу аялал жуулчлалын нислэг үйлдэхээр төлөвлөжээ. Манай гарагийн дагуул руу аялах аяллын тийз нь 150 сая долларын үнэтэй байх гэнэ. Британийн компани Сар руу үйлдэх нислэгт оросуудын 1970-аад оны үед сансрын тагнуул хийх зорилгоор бүтээсэн "Алмаз" гэдэг тойрог замын хоёр станцыг ашиглахаар төлөвлөж байна. Алсын зайд аялахын тулд аппаратуудад шинэ хөдөлгүүр суурилуулах юм. Жуулчид 90 шоо метр бүхий тохиолог орон зайд аялах бөгөөд энэ капсул нь тэднийг нарны хортой туянаас найдвартай хамгаалах аж. Тус компанийнхан Саран дээр буух болон эх дэлхийдээ буцан ирэх нислэгийг гурав хүртэл хүний багтаамжтай буулт хийх зориулалттай дөрвөн аппаратаар үйлдэхээр төлөвлөж байгаа ажээ. Аппарат тус бүр 15 удаа нислэг үйлдэнэ. Жуулчдыг Сар руу хүргэх "Алмаз"-уудыг Оросын "Протон" пуужингаар хөөргөх юм.  Жуулчид тойрог замаар Сарыг тойрон ниссэнийхээ дараа эх дэлхийдээ буцан ирж магадгүй байна. Нислэгийн дийлэнх хэсгийг компьютерээр удирдах ажээ.
Хэрвээ "Excalibur Almaz" компани нислэгийг амжилттай үйлдвэл Америкийн "Апполон-17" хөлгийн 1972 онд үйлдэж байсан нислэгээс хойш Сар руу хүн илгээсэн анхны нислэг болох юм. Тус компани 2015-2025 он хүртэл 30 орчим ийм аялал зохион байгуулахаар төлөвлөжээ. Түүнчлэн,  энэ онд тойрог замд анхны аялал жуулчлалын нислэгийг үйлдэх ёстой юм. Түүхэнд тэмдэглэгдэн үлдэх энэ нислэгийг тэрбумтан Ричард Брэнсоны "Virgin Galactic" компани зохион байгуулна. Жуулчдыг тойрог замаар аялуулах "White Knight Two" хөлөг туршилтын нислэгээ хэдийнэ үйлджээ. Харин тойрог замд 200 мянган доллароор аялах тасалбарыг хэдэн зуун хүн захиалаад байгаа гэнэ.