Санал хураах явцад гарч байгаа зөрчлүүдийн талаар МАХН-МҮАН-ын “Шударга ёс” эвслээс хэвлэлийн хурал хийв. Тус албаны ажлын албаны дарга Ч.Отгонбаатар “Сонгуулийн явцад хэд хэдэн ноцтой зөрчил гарч байна. УИХ-ын 23-р тойргийн санал хураах тавдугаар хэсгийн хурууны хээ таних машин эвдэрсэн нь бидний хувьд санаатай үйлдэл гэж үзэж байна. Мөн Сүхбаатар дүүргийн тавдугаар хороолол, гуравдугаар хорооны 18 дугаар байрны 24 тоотод нэг оршин суугч байдаг боловч хоёр хүн нэмж бичин сонгууль өгүүлэхээр оролдож байлаа. Түүнчлэн Чингэлтэй дүүрэг Салхитын сургуульд байрлаж байгаа болон бусад санал авах байр, сонгуулийн хуулийн дагуу 07.00 цагт санал хураах үйл ажиллагааны нээлтийг хийж чадаагүй. Ихэнх нь 07:10-7:40-ийн хооронд хийгдсэн. Эрдэнэтийн 15, 13-р хэсгийн хороон дээр шөнийн 22:00-00:00 цагийн хооронд хурууны хээний кодыг тайлж, түгжих програмыг хийхгүй хоносон.УИХ-ын сонгуулийн 25-р тойргийн 36-р хэсгийн санал авах байрны санал тоолох машины код, нээх түлхүүр хоорондоо таараагүйгээс болж ажиллахгүй байсан ба энэ зөрчлөө арилгалгүйгээр нээлтээ хийлээ. УИХ-ын сонгуулийн 26-р тойргийн, 27-р хэсгийн тойргийн хороонд харъяалалтай иргэн Балжиннямын Шадавдоржийн хаяг дээр ам бүлийн сонгууль өгөх хүний тоо хоёр байх ёстойгоос гурав болгосон байсныг нэрийн тулгалт хийхдээ мэдэж засвар хийлгэхийг хүссэн боловч 28-ны өдөр санал өгөх үед энэ тоо гурав хэвээр байсан” гэв. Тиймээс тус намаас СЕХ-нд хандан, эдгээр зөрчлийг арилгах албан бичиг хүргүүллээ.
Б.Чимэг
