"Эрдэнэт үйлдвэр” ХХК-ийн удирдлагууд өчигдөр сүүлийн үед зарим хэвлэлүүдээр гарч байгаа мэдээлэл болоод УИХ-ын дэд дарга Ц.Нямдоржийн мэдэгдлийн талаар дэлгэрэнгүй мэдээлэл өгөв.

"Эрдэнэт үйлдвэр” ХХК-ийн захирал Ц.Даваацэрэн “Эрдэнэт" үйлдвэрийн үйл ажиллагаа хэвийн явж байгааг дурдаад "2016 оны эхний есөн сарын байдлаар өмнөө тавьсан зорилтуудаа биелүүлэн ажиллаж байна. УИХ-ын дэд дарга Ц.Нямдорж гуайн Эрдэнэт үйлдвэрээс улсын төсөвт оруулах ёстой татвар бага байна гэсэн агуулгатай мэдээлэл хийсэнтэй холбогдуулан олон иргэд хариулт нэхэх болсон. Тэгвэл Эрдэнэт үйлдвэр оны эхний найман сарын байдлаар улсын төсөвт 60 тэрбум, орон нутгийн төсөвт 70 тэрбум төгрөг төвлөрүүлсэн. Нийтдээ 130 тэрбум төгрөг төсөвт төвлөрүүлсэн" гэдгийг онцлов.

Эрдэнэт үйлдвэр орон нутагтаа найман төрлийн татвар төлдөг аж. Тэгвэл оны эхний найман сарын байдлаар орон нутгийн төсөвт 70 тэрбум төгрөг төлчихсөн байгаа юм байна. Харин улсын төсөвт жилд 64 тэрбум төгрөг оруулах ёстой байдаг бөгөөд үүний 40 тэрбумыг нь 2015 онд урьдчилаад төлсөн байна. Тиймээс энэ онд 20 тэрбумыг төлөөд байгаа бөгөөд үүнийг нь Ц.Нямдорж гишүүн бага татвар төлсөн гэж буруу ойлгосон байх гэдгийг хэвлэлийн хурлын үеэр Эрдэнэт үйлдвэрийн удирдлагууд онцолж байсан юм.

2016 оны эхний долоон сарын байдлаар Эрдэнэт үйлдвэр улсын төсвөөс авлагатай байгаа аж. Энэ талаар "Эрдэнэт үйлдвэр” ХХК-ийн захирал Ц.Даваацэрэн "Улс орон эдийн засгийн хүнд нөхцөлд байхад манай үйлдвэр байнга хамтарч ажиллаж ирсэн. 2015 оны сүүлээр Засгийн газраас боломжтой бол татвараа урьдчилж төлөөчээ гэж хүссэн. Бид дотоодын банкнаас зээл авч төсөвт төвлөрүүлсэн.Эрдэнэт үйлдвэр төлөх ёстой татвараа төлөөд, ажилчдынхаа цалинг цагт нь тавиад явж байгаа. Үйлдвэрийн үйл ажиллагаа хэвийн байхад битгий улстөржүүлээч ээ гэж хүсмээр байна" гэсэн юм. 

 
“Эрдэнэт үйлдвэр”-ийн 49 хувийн хувьцаатай холбоотой асуудалд мөн тус үйлдвэрийн удирдлагууд байр сууриа илэрхийлсэн юм. Энэ талаар “Төр засгийн түвшинд хийгдсэн ажил. 49 хувийн хувьцааг хэн, хаанаас яаж худалдаж авсныг бид мэдэхгүй. Харин 49 хувийн хувьцаа зарагдсантай холбоотойгоор манай байгууллагад ямар нэгэн өөрчлөлт ороогүй. ТУЗ байгуулагдаад тэндээс ирсэн шийдвэрээр бол хэлтэс бүрт орлогч дарга томилогдож, эдийн засгийн хэмнэлтийн бодлогоо сайжруулж, үр ашгаа нэмэгдүүл гэх чиг үүрэг өгсөн.“Эрдэнэт үйлдвэр” төрийн 51 хувийн өмчлөлтэй, хувийн хэвшлийн “Монголын зэс” ХХК-ийн 49 хувийн өмчлөлтэй болсон. Нэг зүйлийг хэлэхэд, “Эрдэнэт үйлдвэр”-ийн удирдлагуудыг улс төрөөс хол байлгаач ээ. Хэрвээ улс төржмөөр байгаа бол “Эрдэнэт үйлдвэр”-ээс хол улс төржөөч ээ. Улс төржсөн мэдээлэл өгмөөргүй байна. Татвар төлөлт, үйл ажиллагааны талаар мэдээлэл өгөх гэж ирсэн. Өнөөдөр бид төрийн эзэмшиж байгаа 51 хувийг хэн нэгэн хүн авч, хувьцаа эзэмшигч өөрчлөгдсөн гэх мэдээлэл аваагүй. Тэгэхээр 51 хувийг Монголын төр эзэмшиж байгаа хэвээр байгаа гэж ойлгож байна. 

“Эрдэнэт үйлдвэр”-т хийгдсэн халаа сэлгээний асуудлаар мөн үйлдвэрийн удирдлагууд нээлттэй мэдээлэл хийсэн. Энэ талаар Ц.Даваацэрэн хэлэхдээ “Өнөөдрийн байдлаар халаа сэлгээ хийгдээгүй. Үйлдвэрт 6092 ажилтан ажиллаж байна. Түүнээс 2016 онд 13 Орос ажилтан өөрийн хүсэлтээр харилцан тохиролцсоны  дагуу ажлаас чөлөөлөгдсөн. Гурван захирлын асуудал шийдэгдсэн. Бидний хийж байгаа ажил Монгол улсын  хууль тогтоомжийн хүрээнд явагддаг. ТУЗ-өөс өгсөн үүрэг даалгаврын дагуу  зохистой засаглалын зарчмын дагуу, олон улсын жишгээр  зарим нэг бүтэц, газар нэгжийг өөрчилж нэгтгэсэн. Үүнээс болж нэг ч хүн  халагдахгүй. Мөн шинээр дарга нэмж томиолох, ажлаас чөлөөлсөн асуудал байхгүй. “Эрдэнэт үйлдвэр”-ийн даргаар Да.Ганболд гэсэн хүн томилогдсон нь  нээлттэй мэдээлэл" гэсэн юм.

24tsag.mn