УИХ-ын гишүүн, Уул уурхайн сайд асан Д.Ганхуягийг Япон улсын Засгийн газраас "Мандах нар" одонгийн "Алт, мөнгөн од" зэрэглэлийн одонгоор шагнах болжээ.

Д.Ганхуягийг  Монгол, Японы Парламентын бүлгийн даргаар ажиллаж байсан бөгөөд хоёр улсын парламентын гишүүдийн харилцаа, харилцан ойлголцлыг нэмэгдүүлэхэд томоохон хувь нэмэр оруулсан хэмээн үнэлжээ.

Одонг гардуулах ёслолын үйл ажиллагаа арваннэгдүгээр сарын 8-ны өдөр Япон улсын Эзэн Хааны ордонд болох юм байна.

Д.Ганхуяг нь Монгол-Японы Парламентын бүлгийн даргын албыг  2004-2010, 2014-2016 онуудад удаа дараа хашиж байжээ. Энэ хугацаандаа хоёр орны харилцааг нягтруулан хөгжүүлэхэд хүчин чармайлт гаргаж ирсэн.

Мөн тэрбээр Японд сургууль төгсөгчдийн ЖУГАМО нийгэмлэгийг үүсгэн байгуулахад гар бие оролцож, 2004 оноос уг нийгэмлэгийн тэргүүний хувьд Японд сургууль төгсөгчид, суралцагсдын харилцааг нэмэгдүүлэх зэргээр идэвхтэй үйл ажиллагаа явуулдаг аж.