УИХ-ын гишүүн О.Баасанхүү Ерөнхий сайд Ж.Эрдэнэбатаас "Эрдэнэт"-ийн асуудалд анхаарлаа хандуулахыг хүсчээ. Тэрбээр "Эрдэнэт"-ийн талаарх хоёр асуудалд Засгийн газрын тогтоол гаргаж өгөхийг хүссэн байна.

"Эрдэнэт"  Үйлдвэр ХХК-ийн хувьцааны 49 хувь ОХУ-аас Монголын талд шилжсэнтэй холбогдуулан манай улсад гэрээгээр ажиллаж буй гадаадын мэргэжилтнүүд удахгүй нутаг буцна. Тухайн асуудлаар дараах хоёр саналыг гаргаж, Засгийн газарт уламжилжээ.  Үүнд:

Нэг. Гэрээт мэргэжилтнүүд буцсаны дараагаар тус үйлдвэрт тодорхой ажлын орон тоо гарах бөгөөд уг ажлын байрыг хэвээр хадгалж, Эрдэнэт хотын оршин суугчдыг ажлын байраар хангах. 

Хоёр. Дээрх гадаадын мэргэжилтнүүдийн ажиллаж амьдарч буй орон сууцыг орон нутгийн өмчид шилжүүлж, Монгол Улсын гурав дахь томоохон бүтээн байгуулалт болох Эрдэнэт хотыг босголцсон, аймаг орон нутгийн хөгжилд үнэтэй хувь нэмэр оруулсан ахмадууд болон хөгжлийн бэрхшээлтэй иргэдийг түрээсийн орон сууц хөтөлбөрийн шугамаар орон сууцжуулах гэсэн асуудлыг тавьжээ.