Өмнөд Солонгос улсын Сөүл хотын цагдаагийн газраас тус улсад гэмт хэрэг үйлдсэн БНХАУ-ын дөрвөн иргэн, Монгол улсын иргэн, 27 настай, эрэгтэй Т нарыг гадуур байцааж эхэлжээ.

БНХАУ-ын дөрвөн иргэн интернэтээр дамжуулан олж авсан солонгос эмэгтэйчүүдийн хувийн нүцгэн зураг, видео бичлэг зэргийг олон нийтэд тараана хэмээн айлган сүрдүүлж, улмаар мөнгө нэхэж авч байсан хэрэг үйлдэгчид байжээ.

Тэдгээр залуучуудтай монгол залуу Т нь Сөүл хотын нэгэн казиногоор үйлчлүүлж байхдаа Хятад улсын иргэн, Солонгос үндэстэн Хунг гэгчтэй танилцжээ. Улмаар Хунг нь Т-д "Өөрийнхөө нэр дээр болон бусад гадаад хүний нэр дээр банкны карт, дэвтэр нээж өгвөл тухайн хүнд 100 мянган вон, чамд мөн 100 мянган вон өгье" гэсэн санал тавьсан байна. Энэхүү саналын дагуу тэрээр гадаадын иргэдээс банкны дэвтэр болон картыг нь тус бүр 100 мянган вон буюу монгол мөнгөөр 210 мянган төгрөгөөр худалдан авч, цааш Хунг гэгчид дамжуулж байжээ.

Цагдаагийнхны мэдээлснээр, тэд сүүлийн хоёр сар гаруйн хугацаанд айлган сүрдүүлэх аргаар олон арван эмэгтэйгээс 420 сая орчим воныг банкаар дамжуулан авахдаа бусдын нэр дээр нээсэн банкны карт, дэвтрийг ашиглаад хаядаг байсан нь тогтоогджээ.