Мэргэжлийн Засгийн газрыг огцруулаад долоо хоногийн нүүр үзэх гэж байна. Гэсэн ч дараагийн Засгийн газрын чимээ гарсангүй. Улс орны эдийн засаг хүндхэн, шийдвэрлэх олон асуудал байгаа энэ үед дараагийн ЗГ-ын яаралтай байгуулах ёстой гэдгийг улс төрд суудалтай намууд болоод бие даагч гишүүн, МҮЭ холбооноос хэлж, шаардаж байна.

УИХ-ын гишүүн С.Жавхлан дараагийн Засгийн газрыг 10 хоногийн дотор байгуулахгүй бол чуулганы танхимаас гарахгүй, хоолойныхоо чавхдасыг тасартал хашгирна гэдгээ ээлжит бус чуулганы үеэр мэдэгдээд амжсан. Харин түүний хэлсэн хугацаа энэ долоо хоногт дуусна.

Гэтэл эрх баригч намынхан дараагийн Засгийн газрыг байгуулахад төдийлөн яаравчлахгүй байна уу эсвэл асуудлыг хэлэлцэж дөнгөхгүй хөнжил дотроо хөлөө жийлцэж байна уу гэдэг нь асуулт хэвээр өрнөж байна. Ямартай ч өчигдөр хуралдсан МАН-ын Удирдах зөвлөлийн хуралдаанаар дараагийн Ерөнхий сайдад нэр дэвшигчийг тодруулах байх гэх таамаг хөвөрч байсан ч хуралдаанаар намын Бага хурлыг энэ сарын 25-нд хуралдуулах, үүнээс өмнө нэр дэвшигчийг тодруулахаар болсон гэх мэдээлэл байгаа юм.

Уг нь хуулийн дагуу дараагийн Засгийн газрыг 30 хоногийн дотор томилох учиртай. Тодруулбал Монгол Улсын Засгийн газрын тухай хуулийн 21.2-т Ерөнхий сайд, Засгийн газрын гишүүн хуульд заасан үндэслэлээр албан тушаалаас огцорсон, чөлөөлөгдсөн, түүнчлэн нас нөгчсөн тохиолдолд түүний бүрэн эрх хугацаанаас өмнө дуусгавар болно. Ийнхүү Ерөнхий сайд, Засгийн газрын гишүүн орон гарсан тохиолдолд Улсын Их Хурал 30 хоногийн дотор түүнийг нөхөн томилно" гэж заасан байдаг.

Тэгэхээр уг нь эрх баригчидад хугацаа байна. Гэтэл хуулийн хугацааг хүлээж суух нь зохистой бус харин ч ээлжит бус чуулганыг яаралтай хуралдуулж, ЗГ-ыг бүрдүүлэх нь зүйтэй гэдгийг өчигдөр УИХ-д суудалтай намуудын төлөөлөл мэдэгдсэн бол МҮЭ-ийн холбооноос ЗГ-ыг яаралтай байгуулахыг хүссэн мэдэгдэлийг УИХ-д хүргүүлэв.

Ардчилсан намын дарга С.Эрдэнэ “Ээлжит бус чуулганыг зарлан хуралдуулж, ЗГ-аа яаралтай бүрдүүлэх нь зүйтэй байна. Учир нь улс орны хэмжээнд өвөлжилтийн бэлтгэл, утаа, хөрөнгө оруулалт, хичээлийн шинэ жилийн бэлтгэл ажил тааруу байгаа, хот тойрсон шүлхийн асуудал гэх мэт тулгамдсан олон асуудал байна.

Хоёрдугаарт, УИХ-ын тогтоол гарахдаа Засгийн газрыг огцруулсан бол дараагийн үүрэг гүйцэтгэгчийг томилдог. Үлдэх хүнээр ачаа бүү татуул гэж ярьдаг шиг өнөөдрийн Ерөнхий сайдаар Засгийн газрын ачааг үүрүүлэх нь тохиромжтой биш гэж бид харж байгаа. Тиймээс Ардчилсан намын бүлэг хуралдаад эрх баригч намд нэн яаралтай Ерөнхий сайдын асуудлыг шийдэх шаардлага тавихаар болсон.

Гуравдугаарт, 60 тэрбумын асуудлыг прокурорын байгууллагаас эвлүүлэг гэж зарласан. Үнэхээр гэмт хэргийн бүрэлдэхүүнгүй, эвлүүлэг хийсэн гэж үзээд байгаа бол энэ шуугианыг тарьсан эзнийг гаргаж, Монгол төрийн нэр хүндийг цэвэрлэх ёстой. Үүнийг эзэнгүй хаях нь байж болохгүй асуудал гэж бид харж байгаа.

Дөрөвдүгээрт, офшорчдод хугацаа олгосон. Өчигдөр Ерөнхийлөгчийн Тамгын Газрын дарга, Авлигатай тэмцэх газрын даргатай уулзахад одоогоор нэг ч хүн ямар нэгэн алхам, үйлдэл хийгээгүй гэсэн. Өнөөдөр хууль, шүүх, цагдаагийн байгууллагууд асуудлаа ил тод, нээлттэй ярихгүй байна.

Энэ жил ургацын 50 орчим хувиа алдах гээд байна. Хүнс хоол, малын өвс тэжээлээ яах юм гэдэг асуудалд бодитой авах арга хэмжээгээ ярьж, мэдээлээгүй.

Тиймээс ээлжит бус чуулганыг яаралтай зарлах шаардлага гарч байгаа. Ээлжит бус чуулган зарлах өөр нэг том шалтгаан нь эрх баригчид маш олон төсвийн хууль зөрчсөн үйлдлүүд хийсэн. Хүүхдийн мөнгийг улс төрийн зорилгоор ашиглаж тавьчихаад өнөөдөр ОУВС-гийн нэрийг барьж олгохгүй байх шийдвэр гаргаж байх шиг байна. Ер нь өнөөдөр төсөвт тулгамдчихаад байгаа олон асуудлууд бий. Алт, зэс, нүүрсний үнэ гадаад зах зээлд өндөр үнэтэй байгаа ч орж байгаа орлогууд хаашаа ороод байгаа нь тодорхойгүй байна” гэв.

УИХ-ын гишүүн, МАХН-ын төлөөлөл О.Баасанхүү “Засгийн газрыг огцруулсан нь намын доторх эрх мэдлийн тэмцлээ УИХ-аар хагалсан хэлбэр гэж би харж байгаа. Огцруулсан гурван үндэслэл энэ Засгийн газрын үйл ажиллагааг дүгнэсэн хэлбэр огт байгаагүй.

Одоо томилогдох Засгийн газарт хэн булчинтай байна түүний хүн л гарах байх. Засгийн газраа МАН-ын 65 гишүүнээс байгуулах ёстой. Чадахгүй гэвэл УИХ тардаг хууль байна. Тэгвэл дахиад сонгууль явуулаад зөв хүчин нь гараад ирнэ.

Хоёрдугаарт Таван толгойгоос болж нэлээн хэрүүлж болж байна. Ард түмнээ бодож байгаа хүн алга. Улаанбаатар хотод шүлхий орж ирсэн. Дээрээс нь энэ өвөл эрчим хүчний нэлээн том доголдол гарч, олон удаа тог тасрах магадлалтай байгаа юм билээ. Өвлийн бэлтгэл, багш нарын цалин болон дээрх бусад асуудлуудыг шийдвэрлэх шаардлагатай байна. Тиймээс би УИХ-ын чуулганыг ээлжит бусаар яаралтай хуралдуулах асуудал тавьж Ерөнхийлөгчид хандсан. Нийгмийн бухимдал дээд цэгтээ хүрээд байна” гэв. 

МҮЭ-ийн холбооноос Засгийн газрыг яаралтай байгуулж, хэвийн үйл ажиллагааг нь хангахыг хүссэн мэдэгдэлийг УИХ-д хүргүүллээ. Тус мэдэгдэлд "Хөдөлмөр, нийгмийн зөвшлийн гурван талт 2017-2018 оны Улсын хэлэлцээрийн хэрэгжилт хангалтгүй, иргэдийн дунд хүлээлт үүсгээд байгаа тэтгэврийн нас, зарим төрлийн татварыг нэмэгдүүлсэн буруу шийдвэрүүдийг залруулах, цалин орлогыг нэмэгдүүлэх, эдийн засгийн хүндрэлийг богино хугацаанд даван туулах зэрэг хөдөлмөрчдийн өмнө тулгамдсан олон асуудлууд шийдвэрлэгдэхгүй удаашралтай байгаагаас нийгэмд үүссэн бухимдал улам нэмэгдсээр байна. Боловсрол, эрүүл мэнд зэрэг зарим салбарт ажиллагсад хөдөлмөрлөх эрх ашгийнхаа төлөө эсэргүүцлээ илэрхийлж эхлээд байна. 

Монгол Улсын Засгийн газар огцроод 5 хонож байгаа хэдий ч цаг хугацаа алдалгүйгээр хуулийн хүрээнд чадварлаг, хариуцлагатай, мэргэжлийн Засгийн газрыг шуурхай байгуулж, нийгэмд хүлээлт үүсгээд байгаа асуудлаар шаардлагатай арга хэмжээг авч, Засгийн газрын хэвийн үйл ажиллагааг шуурхай хангахад Улсын Их Хурлын зүгээс онцгой анхаарч ажиллахыг мэдэгдэе" гэжээ.

24tsag.mn