Өнгөрсөн долоо хоногт улс төрийн томилгоог түргэтгэж, цагийн дотор халаа сэлгээг яаж хийдгийг яруу тодоор харуулаад авсан Хууль зүйн сайд болоод Ц.Нямдорж болон түүний нөхөд энэ долоо хоногт мөн л томилгоо хийж магадгүй нь. Учир нь Тагнуулын Ерөнхий газрын дарга нь салбарын сайдтайгаа “дайн” зарлачихав. Ингэж дайтахын цаана нэг биш нэлээд хэдэн шалтгаан байгаа нь тодорхой. Тиймдээ ч хээв нэг хэвлэлийн хурал зарлаж, мөнгө идсэн уусан гэдгийг нь баримттай хэмээн тоочив. Харин үүний хариуг нь Хууль зүйн сайд нь “Зул бөхөхийнхөө өмнө бадамладаг. Ийм л үйл явц. Би солино. ЦЕГ-ын даргыг ч солино” гэж өгөх жишээний. Уг нь Тагнуулын Ерөнхий газрын даргын албан тушаал гэдэг улс төрийн өнгө аясаар өөрчлөгддөг “мест” биш баймаар. Төрийн өндөрлөгүүдийн нөхцөл байдлаас эхлээд улс орны өмнө тулгарч байгаа аюулыг ямар нэгэн улс төрийн нөлөөлөлгүйгээр хамгаалах үүрэгтэй байгууллага. Хамгаалахаас гадна хянах үүрэг ч тэдэнд бий. Тиймээс энэ байгууллагын удирдлага солигдох нь хэнд ашигтай байх вэ.

Нөгөө талаар хуулийн салбарынхан хоорондоо хөлөө жийлцээд байвал ажил нь ахихгүй нь ойлгомжтой. Гэхдээ Засаг нь Тагнуулын Ерөнхий газраа удирдаж, хийх ажлыг нь заавал “хэмжээгүй эрхэт хаан”-аас ялгаа юун. Ямартай ч өнгөрсөн долоо хоногт өрнөсөн Хууль зүйн сайд, ТЕГ-ын даргын нарын хэрүүл хуулийн томоохон байгууллагуудын удирдлагыг чөлөөлөх асуудлыг түргэсгэв. Тагнуулын Ерөнхий газрын даргаас гадна АТГ-ын даргын албан тушаал ч дараагийн хүнээ хүлээгээд эхэлчихэж.  

Хэдийгээр Хууль зүйн сайдад Тагнуулын Ерөнхий газрын даргыг чөлөөлөх эрх мэдэл дутах ч Засгийн газар нь нэг л шийдвэл Б.Хурцад “баяртай” болно. Эх сурвалжийн хэлж байгаагаар шинэ ТЕГ-ын дарга айсуй гэнэ. Харин хэн нь вэ гэдгийг сонгох л үлдсэн бололтой. Учир нь Тагнуулын Ерөнхий газрын дараагийн даргад ТЕГ-ын дарга асан Р.Болд, ТЕГ-ын орлогч дарга Б.Энхсүх, ЦЕГ-ын дэд дарга асан А.Дулаанжаргал нарын нэр яригдаж эхэлжээ.  ЦЕГ-ын дэд дарга асан А.Дулаанжаргал нь өмнө нь АТГ-ын даргад яригдаж байсан ч томилогдож чадаагүй. Тиймээс энэ удаад дээрх хоёр байгууллгын аль нэгийг удирдана гэсэн яриа багагүй хүрээнд яригдаж байна. Хэрэв АТГ-ын даргад зүтгэвэл түүний өрсөлдөгчөөр ШШГЕГ-ын дарга асан Б.Билэгт байгаа. Түүнийг  ЕТГ-ын дарга З.Энхболд зүтгүүлж буй гэх. 

Харин ТЕГ-ын даргад хүч үзвэл Б.Энхсүх, Р.Болд нарын нэр дэвшигчидтэй өрсөлдөнө. Б.Энхсүхийн хувьд энэ байгууллагад арваад жил ажиллаж байгаа 1979 онд төрсөн залуухан боловсон хүчин аж. Тагнуулын ерөнхий газарт ажилтан, ахлах ажилтан, тасаг, хэлтсийн дарга хүртлээ дэвшсэн, 2014-2016 онд Монгол Улсаас БНХАУ-д суугаа Элчин сайдын яаманд зөвлөх, Консулын хэлтсийн дарга, 2016 оны наймдугаар сарын 24-нөөс ТЕГ-ын дэд даргаар томилогдон ажиллаж байгаа юм байна. Харин Р.Болдыг Ерөнхий сайд асан С.Баярын “хүн” гэдэг.  Мөн ТЕГ-ын даргын албан тушаал түүнд шинэ биш. Тэрбээр Америкт Элчин сайдын алба хашиж байгаад Монголд дуудагдан ирж тус газрын дарга болсон түүхтэй. Авлигатай тэмцэх газрын даргын суудал сөхөгдөх үед Тагнуулын ерөнхий газрын даргын суудлаас зөөлөн санагдсан уу, яасан Р.Болд юутай ч сэмхэн нэр дэвшсэн авч С.Баярын хүн гэдгээрээ "сонгуульд" бүдэрсэн удаа ч түүнд бий.

Ямартай ч ойрын хугацаанд Тагнуулын даргын томилгоог шийдвэрлэх нь. Хууль зүйн сайд Ц.Нямдорж сайдын санал болгох хүн Ерөнхий сайдын таалалд нийцэх юм бол процессын дагуу Ерөнхийлөгчтэй зөвшилцөх ёстой. Гэхдээ зөвшилцөл гэдэг бол бэлгэ тэмдгийн шинж чанартай учир Ерөнхий сайдын эрх мэдлийн асуудал гэж хэлж болохоор байна.

24tsag.mn