Эдийн засгийн хүндрэлийг даван туулах гарцыг ОУВС-тай хамтран олох шийдвэрийг Монгол Улсын Засгийн газар гаргасан. Тус сангийн Өргөтгөсөн санхүүжилтийн хөтөлбөрт хамрагдаж, элгээрээ хэвтсэн эдийн засагт эмчилгээ хийж байгаа. Валютын сангийн зүгээс ч хяналт тавьж, эмчилгээ хэр дүнтэй болж байгааг шалгасаар. Өнгөрөгч сард тус сангийн хяналт шалгалтын баг монголд айлчилж, сэхээнд орсон эдийн засаг сэхэл авч байна уу гэдгийг хяналаа.

Тэгвэл үзлэгээр ямар шинж тэмдэг илэрч байгаа талаарх мэдээллээ сангийн ажлын хэсгийн ахлагч Жефф Готтлеб, Сангийн сайд Ч.Хүрэлбаатар нар дуулгалаа. Ажлын хэсгийн ахлагч Жефф Готтлеб “Эдийн засгийн гүйцэтгэлийг харахад бидний төсөөлж байсан үр дүнгээс өндөр гарсан. Эдийн засгийн өсөлт сайжирсан нь түүхий эдийн үнэ дэлхийн зах зээлд өндөр байгаатай холбоотойгоор экспортын орлого нэмэгдсэн байна. Өнгөрсөн оны дөрөвдүгээр сараас хэрэгжсэн “Өргөтгөсөн санхүүгийн хөтөлбөр” нь 5.5 сая ам.долларын санхүүжилтийн багцтай. Энэ хөтөлбөрийн хүрээнд Олон улсын валютын сан бусад түншлэгч байгууллагуудтай хамтран оролцож байгаа. Хөтөлбөрийн хэрэгжилтээс нааштай үр дүнгүүд гарч эхэллээ” гэж онцолсон юм.

Мөн Монгол Улсын хувьд ойрын хугацаанд төлөгдөх ёстой байсан гадаад бондуудын эргэн төлөлтийг шийдвэрлэж чадсан, Гадаад валютын нөөц 1.8 тэрбум ам.доллараар нэмэгдэж, Засгийн газрын өрийн хэмжээ арав орчим хувиар буурсан байна. Энэхүү нааштай өөрчлөлтүүдийн үр дүнд төгрөгийн гадаад валюттай харьцах ханш тогтворжиж, хүүгийн түвшин буурчээ. Ойрын хугацаанд Засгийн газрын өрийн үйлчилгээний хуваарь хаалтаас гарсан байна. Ингэснээр жилийн өмнөхөө бодвол эдийн засгийн эрсдэлд өртөх магадлал багассан гэж тайлбарлалаа.

Эдийн засгийн өсөлт сайжирсан нь экспортын гүйцэтгэлтэй шууд холбоотой хэдий ч Засгийн газрын зүгээс зөв бодлого хэрэгжүүлсний дагуу энэ бүх үр дүн гарсан аж. Засгийн газрын зүгээс төсвийн алдагдлыг бууруулах чиглэлээр, гадаад валютын нөөцөө нэмэгдүүлэх чиглэлээр тууштай арга хэмжээ авч чадсан нь ийм үр дүнд хүргэжээ. Ганцхан жилийн хугацаанд эдийн засагт нааштай өөрчлөлтүүд гарсан ч цаашдаа нөхцөл байдал энэ хэвээр үлдэх баталгаагүй. Эдийн засагт эрсдэл нүүрлэсэн хэвээр байгаа. Хамгийн ойрхон эрсдэл бол экспорт огцом буурах. Мөн дэлхийн зах зээлд газрын тосны үнэ нэмэгдвэл Монгол Улсын эдийн засагт том цочрол болж болзошгүй хэмээн таамаглаж байгаа юм. Тиймээс энэ эрсдэлүүдээ харгалзан үзээд нэг жилийн хугацаан эдийн засгийн өсөлтөд хүргэсэн бодлогуудаа үргэлжлүүлэх хэрэгтэй гэдгийг санууллаа. Засгийн газрын зүгээс төсөв болон мөнгөний бодлогоо зөв хэрэгжүүлж чадвал эдийн засаг тогтвортой, хүртээмжтэй өсөлтөд хүрэх боломжтой ажээ.

Валютын сангийн ажлын хэсгийнхэн эдийн засгийн эмчилгээнд дээрх дүгнэлтийг хийж, онош тавилаа. Цаашид бодлогоо тогтвортой байлгаж, сэхээний тасгаас энгийн тасагт шилжиж байгаа эдийн засгаа дахин муутгачихгүй байхыг анхааруулсан юм. Ямартай ч эдийн засаг хөл дээрээ босох найдвар байна. Хонгилын үзүүрт гэрэл гарлаа. Харин хэрхэн бат зогсоох нь Засгийн газар, УИХ, мэргэн түшээдийн бодлогоос хамаарах нь.