Эрдэнэт үйлдвэрийн хүдрийн хувирал, эрдсийн найрлагын хэв шинжийг нарийвчлан тогтоож, эдгээр эрдсийн үйлдвэрлэлийн үйл ажиллагаа дахь нөлөөллийг судлах ажлыг Хан лаб, Минекско компани, ШУТИС-ийн судалгааны баг хамтран эхлүүлжээ. Өнгөрсөн оны сүүлээр эхэлсэн тус судалгаа нь “Эрдэнэтийн овоо ордын гео металлург ба хүдрийн хувирал, эрдсийн найрлага процесст үзүүлэх нөлөө” сэдвийн дор гүйцэтгэж байгаа аж. Уг судалгааг хийж буй Минекско компани нь уул уурхайн зөвлөн туслах үйлчилгээ эрхэлдэг бол Ханлаб компани эрдэс судлалын үйл ажиллагаа явуулдаг юм.

Судалгааны багийнхан өнгөрсөн долоо хоногт Эрдэнэтийн овооны эрдсийн найрлага, хүдрийн хувирлын талаарх судалгааны явцын үр дүн, ерөнхий байдлыг танилцуулсан байна. Уг судалгааны ажилд Геологи уул уурхайн сургуулийн ашигт малтмал баяжуулалтын профессорын баг оролцож, мэргэжлийн дүгнэлт өгч буйг энэ үеэр онцоллоо. Танилцуулгыг Үйлдвэрлэлийн хэлтэс, Лаборатори судалгааны төв, Геологи маркшейдерийн хэлтэс зэрэг холбогдох цех хэлтсүүдийн төлөөлөл сонсож, санал солилцов. Хэлэлцүүлгийн үеэр гарсан санал шүүмжийг тайландаа тусгаж, судалгааны дүн мэдээллийг боловсруулах явцыг эрчимжүүлж ажиллахыг судалгааны хамтарсан багийнханд чиглэл болгожээ.