Авлигатай тэмцэж, нийгмийг эрүүлжүүлэх ажил эрхлэгч АТГ ширүүхэн байна. Ээлж дараалласан баривчилгааг хийсээр. Төрийн өндөр дээд хэргэм зэрэг хүртэн, албан тушаал эзэмшин суусан нөхдийн булайг дэлгэж, хариуцлага үүрүүлэхээр тэд шуурхайлан ажиллаж эхлэв. Оюутолгой, Дубайн гэрээтэй холбогдсон эрхмүүдийг барьж, цагдлаа. Хорих ангийн зүг алхаж, төмөр торны цаана суугаа эрхмүүдийн араас хэчнээн хүн зочлох бол гэсэн таамаг ч уралдаж байна. 

Тэгвэл өчигдөр дахин нэг баривчилгаа хийжээ. Сүүлийн хэдэн сар Монгол Улсын саалийн үнээ хэмээн нэрлэгдсээр ирсэн, өнөөдөр уг нэршлээрээ яваа Эрдэнэт үйлдвэрийг тойрсон олон асуудал өрнөөд амжсан. Өр зээлийн асуудал ч яригдана. Уг хэрэгт холбоотой Жаст группээр овоглогдох Ш.Батхүүг цагдан хорьж байгаа. Тэгвэл АТГ-аас "Эрдэнэт" үйлдвэрийн хуулийн хэлтсийн даргаар ажиллаж байсан н.Мөнхжаргалыг өчигдөр саатуулж, мөрдөн шалгах ажиллгаагаа явуулж эхэллээ.  

Үүнээс гадна тус үйлдвэрээс баталгаа гаргуулж, "Стандарт" банкнаас их хэмжээний зээл авсан гэх хэрэгт холбогдуулан Эрдэнэт үйлдвэрийн худалдааны хэлтсийн даргаар ажиллаж байсан н.Амарбатыг ч сэжигтнээр татан саатуулсан. Түүнийг АТГ-аас яллагдагчаар татах саналаа прокурорын байгууллагад хүргүүлсэн ажээ.

Ийнхүү хаврын синдромтой зэрэгцсэн их баривчилгаа, нотолгоо шаардсан шалгалт үргэлжилж байна. Цаашид цар хүрээ хэр хэмжээтэй тэлэх нь одоогоор тодорхойгүй. Ямартай ч асуудал үүсгэсэн нөхдүүдийг шалгаж байна. АТГ-ын зүг алхах дээдсүүдийн тоо үүгээр дуусахгүй болов уу.