Увс аймгийн Сагил сумын 50 хүүхдийн цэцэрлэгийн барилгын хананууд цуурч, үйл ажиллагаа явуулах аргагүй байдалд оржээ. Хэдхэн жилийн өмнө ашиглалтад орсон энэхүү цэцэрлэгийг Ц.Отгонбямбаа захиралтай “Мөнхийн Ундраа Увс” компани барьсан бөгөөд Увс аймгийн Засаг дарга асан Д.Цэндсүрэн 382 сая 550 мянга, 308 төгрөгийг төсвөөс гаргуулж өгсөн юм байна. Хамгийн сонирхолтой нь энэхүү барилга зураг төслийнхөө дагуу 1.6 метр суурьтай байх ёстой ч Ц.Отгонбямбаа захирал 30 см-ын суурьтай хийж, үүнийг нь зураг төслийнх дагуу хийсэн гэж Д.Цэндсүрэн болон комиссын гишүүн Г.Отгонболд хүлээж авсан юм байна. Гэтэл одоо энэ барилгын хананууд цуурч, нуралт өгөхөд бэлэн болсон бөгөөд “Барилгын ашиглалтыг зогсоох тухай” Мэргэжлийн хяналтын газрын акт гарчээ. Тиймээс ч энэ талаар Увс аймгийн ИТХ-ын төлөөлөгч С.Анхбаяр “Гэрээ хийсэн Засаг дарга Д.Цэндсүрэн, барьсан Ц.Отгонбямбаа, хүлээж авсан Г.Отгонболд нам бүлгээрээ үгсэн хуйвалдаж улсын төсөв мөнгө шамшигдуулсан гэж хардахаас өөр аргагүй” хэмээн олон нийтийн сүлжээгээр байр сууриа илэрхийлсэн байна. Мөн тэрээр “Өөр асуудал бол яах вэ гэхсэн. Газрын наймааг чинь нүдээ аниад өнгөрүүлж болно. Гэхдээ хүүхэд шүү дээ, хүүхдийн сурч хүмүүжих орчин. Хэрэв энэ барилга нэг өдөр нураад бяцхан хүүхдүүдийг маань дарчихсан бол яах вэ? Увс аймагт сүүлийн 2 жил 5-6 балл хүртэл хэд хэдэн хүчтэй газар хөдлөлт болсон. Эрсдэл хамар дор байна. Бяцхан хүүхдүүдийн ирээдүй, хувь заяа, амь насыг юман чинээ боддоггүй та гурвыг яах вэ?” хэмээн байр сууриа илэрхийлжээ.