Өнгөрсөн оны 12 дугаар сарын дундуур БНСУ-д суух Онц бөгөөд бүрэн эрхт Элчин сайдаар томилогдож байсан ТЕГ-ын дарга асан Б.Хурц сая 14:20 цагийн үед хөх драпан пальто өмсчихсөн, Хөрөнгийн биржийн үүдээр хойшоо алхаж хуучин ажиллаж байсан ТЕГ-руугаа явж байх шиг болов. Уг нь мань эрийг БНСУ-д оршин сууж элдэв хэл амнаас холхон байгаа гэгдэж байсан ч ямартай ч эх орондоо хүрэлцэн ирсэн нь ийнхүү тодорхой болов.

Түүний зургийг араас нь гар утсаар авах гэтэл ихэд муухай харсан тул бушуухан утсаа далд хийсэн юм.

Тэрээр БНСУ-д суух Элчин сайдаар томилогдсон түүхийг сөхвөл өнгөрсөн 2017 оны 11 дүгээр сарын 15-нд эхлээд УИХ-ын Аюулгүй байдал, гадаад бодлогын байнгын хорооны хуралдаанаар хэлэлцээд гишүүдийнх нь 78.6 хувийн саналаар БНСУ-д суур Онц бөгөөд бүрэн эрх Элчин сайдаар томилохыг дэмжсэнээр сарын дараа буюу 2017 оны 12 дугаар сарын 15-нд УИХ-ын чуулганы нэгдсэн хуралдаанаар Элчин сайдаар баталж байсан билээ. Тухайн үед Тагнуулын ерөнхий газрын дарга асан Б.Хурцыг Элчин сайдаар томилох эсэх асуудлыг хэлэлцээд гишүүдийн олонхийн саналаар дэмжин, баталсан байдаг. Тус хурлыг хаалттай хуралдуулах саналыг УИХ-ын гишүүн О.Баасанхүү гаргаж хаалттай горимоор хуралдуулахаар болж байж.

Түүний намтраас сонирхвол Батын Хурц нь 1969 онд төрсөн. Энэ жил 50 хүрч яваа нэгэн ажгуу. 2000-2002 онд Тагнуулын ерөнхий газрын ажилтан, 2002-2004 онд Монгол Улсаас БНУУ-д суугаа ЭСЯ-ны I нарийн бичгийн дарга, 2004-2005 онд Монгол Улсаас Турк улсад суугаа ЭСЯ-ны I нарийн бичгийн дарга, 2005-2006 онд Тагнуулын ерөнхий газрын газрын дарга, 2006-2009 онд “МИАТ” ХК-ийн Сөүл хот дахь Ерөнхий төлөөлөгч, 2009 оноос Монгол Улсын ҮАБЗ-ийн Ажлын албаны даргаар ажиллаж байсан байдаг. Хамгийн сүүлд ТЕГ-ын даргаар дахин ажиллаж байсан болов уу.

Ямартай ч ТЕГ-ын дарга асан Б.Хурц Монголдоо иржээ.

Д.Түвшин