Бадарчин явсан газар балагтай, батгана суусан газарт өттэй гэж . . .Ардын зүйр үгний агуулга цаг ямагт амьдрал дээр давтагдаж байх юм даа. Ардчилсан хувьсгалын нэрээр төр засгийн өндөр албан тушаал дээр сэвхийтэл гараад ирсэн хүмүүсийн нэг нь Да.Ганболд байлаа. Засгийн газрын Тэргүүн Шадар сайд, Өмч хувьчлалын комиссын дарга гээд л . . . Ардчиллынхны дунд олон Ганболд байсан. Овгийн эхний үсгээр нь бол Да, До, Цо гээд л. Өнгө төрх, үйлдлээр нь ч манайхан ялгах гэж янз бүрээр л нэрлэдэг. Үндэсний дэвшлийн, Өмч хувьчлалын, Хал . . ., Хя. . . гээд олон тодотголтой Даваадоржийн Ганболдын хувьд монгол хүн бүрийн өмчтэй байх эрхийг нээж, өмчийг нь эргүүлээд хурааж авах үйлдлийн эхийг тавьж, гардан гүйцэтгэсэн хүн гэвэл хэтрүүлэг болохгүй. Өмч хувьчлалын талаар ард олон тодорхой ойлголт авч амжаагүй байхад Улсын Бага Хурал-аар Өмч хувьчлалын тухай хуулийг яаран сандран батлуулж, бүх нийтийг хамарсан үймээн дэгдээж, үнэт цаас хэмээх үнэгүй цаасыг тарааж, улсын өмчийг хэсэг бүлэг хүмүүсийн гарт үнэгүй өгөх эх суурийг тавьсан хүн гэвэл яах аргагүй Да.Ганболд билээ. Улмаар менежментийн хувьчлал нэрээр олон зуун обьектийг танил тал, нам эвслийнхэндээ найр тавин сул өгч улсын өмчийг шамшигдуулсанхүн  гэж бас болно. Ингэж улсын өмчийг хулуулж, хөрөнгийг нь хүүдийлж авсан нөхдүүд одоо амташсан хэрээ арван гурав дахидаг гэгчээр улс эх орноо хулгайлж зарах гэж бие биенээсээ өрсөн тэмцэлдэж байна. 
Хаана хөрөнгө мөнгөний эрх ашиг байна, тэнд  Да.Ганболд байнга л цухалзаж явдаг гэмтэй. Монголын Төмөр Зам гээд бие даасан томоохон компани байгуулагдахад тэр хэзээний л Ерөнхий захирал нь болчихсон тууж явсан. Дараа нь юу боллоо, хоосон шороо овоолж, 267 сая ам.долларыг салхинд хийсгэсэн тухай асуудал босч ирсэн. Оюун толгойн асуудал өрнөхөд мөн л төрийн өмчит Эрдэнэс-Оюутолгой компанийн захирал болчихсон байсан. Төд удалгүй Ч.Сайханбилэгтэй хамтраад Дубайн гэрээ гэгчийг хилийн чандад хулгайгаар байгуулж Монгол Улсыг 2 тэрбум ам.долларын өрөнд оруулж, ард түмний хүртэх ёстой ашгийг 17 жилээр хойшлуулсан гэмт хэрэг үйлдсэн. Энэ бүхнийг зүгээр л нэг мэдэн будлиад хийсэн гэвэл гонжийнжоо. Ямар их авлига хээл хахуулийн мөнгө эргэлдсэн бол гэхээр ой гутмаар. Тэрээр ингээд зогсохгүй үүний дараа Уулын баяжуулах Эрдэнэт үйлдвэрийн 49 хувийн хууль бус худалдан авалтыг зохион байгуулахад гар бие оролцож, одоо бүүр Эрдэнэт үйлдвэрийн ТУЗ-ийн дарга болчихсон, дур зоргоороо авирлаж, улсын өмчөөс зуу зуун мянган доллараар нь тараагаад сууж байна. 
Ардчиллынханд Да.Ганболдоос өөр эдийн засагч байхгүй юм уу, эвсэл түүн шиг элдэвтэй хулгайч олдохгүй байгаа юм болов уу? Юм юманд үсчсэн энэ хулгайчаас болоод монголын ард түмэн хэдий хүртэл зовох ёстой юм бэ? 
Балаг нь дуусдаггүй Да.Ганболдоос салж амрах цаг ирээгүй юу? Байцааж мөрддөг газар нь барьж шийтгэх болоогүй юу? 
Г.ЭНХБААТАР