Байгаль орчин, хүнс, хөдөө аж ахуйн байнгын хорооны хуралдаанаар Монгол Улсын иргэнд газар өмчлүүлэх тухай хуульд өөрчлөлт оруулах тухай, Монгол Улсын иргэнд газар өмчлүүлэх тухай хуулийг дагаж мөрдөх журмын тухай хуульд өөрчлөлт оруулах тухай хуулийн төслийн анхны хэлэлцүүлгийг хийлээ.
Засгийн газраас 2018 оны дөрөвдүгээр сарын 18-ны өдөр өргөн мэдүүлсэн уг хуулийн төслийн анхны хэлэлцүүлэгтэй холбогдуулан Ж.Энхбаяр, Х.Болорчулуун, Д.Тэрбишдагва нарын гишүүд асуулт асууж, санал хэлсэн юм. Гишүүдийн зүгээс иргэдэд газар өмчлүүлэх хуулийг үр дүнд хүргэхийн тулд эдийн засгийн эргэлтэд хэрхэн оруулах, нийслэл хотод өмчлөх газар байгаа эсэх, цаашдаа улсын хэмжээнд бэлчээр, тариалангийн бүс, тусгай хэрэгцээт газраас бусад иргэд өмчлөх газрын нийт талбай нөөц хэр байгаа талаар тодруулав.
Барилга, хот байгуулалтын сайд Х.Баделхан "Иргэдэд газар өмчлүүлэх хуулийн хугацааг өмнө нь гурван удаа сунгасан бөгөөд энэ хугацаанд манай улсын нийт иргэдийн 18.3 хувь, нийт өрхийн 62 хувь нь гэр бүлийн хэрэгцээний зориулалтаар газрыг үнэгүй өмчилж аваад байна. Иргэдийн хувьд дэд бүтэц, инженерийн шугам сүлжээнд холбогдсон газрыг өмчлөх сонирхолтой байдаг. Нөгөөтэйгүүр, 1997 онд баталсан газрын суурь үнийг өнөөдөр хүртэл мөрдөж байгаа учраас эдийн засгийн эргэлтэд оруулах боломж, нөхцөл тааруу байна" гэдгийг онцолсон.
Харин Ажлын хэсгийн зүгээс, одоогоор нийслэлийн Сүхбаатар, Чингэлтэй, Баянгол дүүргүүдэд иргэдэд өмчлүүлэх газар байхгүй. Харин Баянзүрх, Сонгинохайрхан, Хан-Уул, Багануур, Багахангай дүүргүүдэд өмчлөх газар бий. Түүнчлэн нийслэлийн иргэд аль ч аймаг, сум, дүүргийн нутагт газар өмчилж авах эрх хуулиар нээлттэй. Ер нь, шинэ суурьшлын бүс байгуулахдаа дэд бүтэц, инженерийн шугам сүлжээ байгуулах асуудлыг тусгах шаардлагатай байна. Одоогоор 840 орчим мянган га газар өмчлүүлэх боломжтой. Засгийн газраас улсын хэмжээнд газар зохион байгуулалтын ерөнхий төлвийг гаргах ажлыг эхлүүлээд байна гэж хариулав.
Гишүүдийн зүгээс зарчмын зөрүүтэй санал гараагүй тул Монгол Улсын иргэнд газар өмчлүүлэх тухай хуульд өөрчлөлт оруулах тухай, Монгол Улсын иргэнд газар өмчлүүлэх тухай хуулийг дагаж мөрдөх журмын тухай хуульд өөрчлөлт оруулах тухай хуулийн төслийг анхны хэлэлцүүлгээр нь батлах саналыг хуралдаанд оролцсон гишүүдийн 90.0 хувь нь дэмжсэн.
