Улирч буй долоо хоногийн даваа гарагт хуралдсан МАН-ын  УИХ дахь намын бүлэг Үндсэн хуульд оруулах нэмэлт өөрчлөлтийн төслийг хэлэлцэж энэ ондоо багтааж Үндсэн хуульд өөрчлөлт оруулна гэж мэдээлсэн бол АН-ын бүлгийн гишүүд  Боловсролын тухай хуульд нэмэлт өөрчлөлт оруулах тухай хуулийн төслийг дэмжиж байгаагаа илэрхийлэхийн хамт Сангийн сайд Ч.Хүрэлбаатар,  Хууль зүй, дотоод хэргийн сайд Ц.Нямдорж нарыг огцруулах бичиг өргөн барьж байгаагаа илэрхийлснээр энэ 7 хоногийн улс төр эхэлсэн. Тэд энэ үндэслэлээ “Сангийн сайд Ч.Хүрэлбаатарын ах нар “Хотгор шанага”-ын уурхайн лицензыг зарсантай холбоотойгоор түүнийг АТГ-аас шалгаж байгаа. Мөн Төсвийн тухай хуулийг зөрчсөн гэж үзэж байгаа. Харин Хууль зүй, дотоод хэргийн сайд Ц.Нямдорж УИХ-ын 2016 оны 69 дүгээр тогтоол, Засгийн газрын 2017 оны 38 дугаар тогтоолыг зөрчсөн хариуцлагагүй үйлдэл нь нотлогдсон” гэсэн юм.

Газар өмчлүүлэх тухай хуульд өөрчлөлт оруулахыг дэмжив

-Мөнгө угаах болон терроризмыг санхүүжүүлэхтэй тэмцэх тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн бусад хуулийн төслүүдийн эцсийн хэлэлцүүлгийг байнгын хороо  хийлээ.  Мөн Хөдөлмөрийн тухай хуулийн шинэчилсэн найруулга  болон дагалдах хуулийн төслүүдийг  хэлэлцэх байсан ч тус хуулийн төслийг  хэлэлцүүлэгт бэлтгэх ажлын хэсэг байгуулсантай холбоотойгоор  хойшлуулав. Түүнчлэн Боловсролын  тухай багц хуулиуд болон  Хүүхдийн мөнгөн тэтгэмжийн олгох хүрээг нэмэгдүүлэх хуулийн төслийг хэлэлцэх нь зүйтэй гэж үзээд байна.

-Монгол Улсын иргэнд газар өмчлүүлэх тухай хуульд өөрчлөлт оруулах тухай, Монгол Улсын иргэнд газар өмчлүүлэх тухай хуулийг дагаж мөрдөх журмын тухай хуульд өөрчлөлт оруулах тухай хуулийн төслийг анхны хэлэлцүүлгээр нь батлах саналыг гишүүд дэмжсэн юм.

Ерөнхийлөгчийн хураах, хасах  санаачлага

-Баасан гарагт Генералуудын өдөр тохиов. Харин энэ өдрийн өмнөхөн Ерөнхийлөгч гурван генералын цолыг  хураалаа. Тодруулбал, гэмт хэрэг үйлдсэн нь шүүхээр тогтоогдож, хорих ял шийтгүүлсэн хэмээн Ч.Амарболд, П.Даш нарт хүртээсэн “Хошууч генерал” цол, Т.Дашдэлэгт хүртээсэн “Бригадын генерал” цолыг тус тус хассугай” хэмээн зарлиг гаргав. 

-Ерөнхийлөгчийн цол хураах санаачлага уяачдаар үргэлжилж, П.Сэргэлэн, Д.Дагвадорж нарын  цолыг хураахаар зарлигдав. Тэрбээр мөн долоо хоногийн эхээр МҮБХ-ныхонд хандан эв зүйгээ олж асуудлаа шийдвэрлэхгүй бол Бөхийн өргөөг төрийн мэдэлд хураан авна хэмээн анхааруулсан юм.

-Гадаадын хэд хэдэн оронд суух Элчин сайд нарын нэр тодорч эхэллээ. Тухайлбал, М.Энхсайхан, С.Баяр нарыг эргүүлэн татаж,  Шведийн Вант улсад суух Элчин сайдаар О.Энхцэцэг, Их Британи, Умард Ирландын нэгдсэн вант улсад улсад суух Элчин сайдаар Н.Тулга нарыг бол Япон Улсад суух Элчин сайдаар Д.Батжаргал, Канад Улсад суух Элчин сайдаар Я.Ариунболд нарыг томилох тухай мэдээлэл байна. 

-Улирч буй 7 хоногт Ерөнхийлөгчийн институцийн зүгээс гарсан  содон санал санаачлага гэвэл АТГ-ын даргыг ард түмний санал асуулгаар тодруулах тухай байлаа. Энэ хүрээнд цахим санал  асуулга эхлээд байгаа бөгөөд эдгээрээс хамгийн олон санал авсан хүний нэрийг АТГ-т томилуулахаар УИХ-д өргөн барих аж.

Тавантолгойд сайжруулсан түлшний үйлдвэр байгуулна

-Засгийн газар  өнгөрөгч 7 хоногт хоёр ч удаа хуралдав.  Засгийн газар Халх голын бүс нутагт хууль бусаар  газар олгосон шийдвэрийг цуцлахаар шийдвэрлэв. Тухайлбал, бүсийн захиргааны өмнөх захирал дээрх бүс нутагт 24 аж ахуйн нэгжид 317 мянга гаруй га талбай хуваарилан гэрчилгээ олгосон байжээ.

-Засгийн газрын хуралдаанаар шийдвэрлэсэн өөр нэг асуудал нь Улаанбаатарын утааг бууруулах зорилтын хүрээнд “Эрдэнэс Тавантолгой” компанийн  харъяанд сайжруулсан түлшний үйлдвэр байгуулахаар шийдвэрлэлээ. Үйлдвэр жилд 90 мянган тонн сайжруулсан түлш үйлдвэрлэж борлуулалтын орлогоороо урсгал зардлаа санхүүжүүлнэ. Нэг тонн шахмал түлшний үнэ нэг тонн түүний нүүрсний үнээс ихгүй байхаар тооцжээ.

Сэтгүүлчдийг тагнасан гэх хэрэг мандав

Хууль зүй дотоод хэргийн сайд Ц.Нямдорж зарим сэтгүүлчийг гэр бүлийнхэнтэй нь хамт тагнаж чагнасан гэх мэдээлэл улирч буй 7 хоногийн хамгийн том дуулиан байв. Энэ хэрэгтэй холбогдуулан Нийслэлийн прокурорын газраас хэвлэлийн хурал хийж энэ асуудлаар Тагнуулын байгууллага мөрдөлт хийж яллах дүгнэлт гаргуулахаар санал ирүүлсэн тухай мэдээлсэн юм. Ингэхдээ Хууль зүй дотоод хэргийн сайд Ц.Нямдорж үүрэг өгсөн эсэхийг мэдээллээгүй ч сэтгүүлчдийг тагнасан, чагнасан гэх асуудлыг шалгаж байгааг нотолсон юм. Тэгвэл Хууль зүй дотоод хэргийн сайд Ц.Нямдорж энэ тухайд “Надад сэтгүүлчдийг тагнах ямар ч хэрэгцээ байхгүй. Харин та нар л намайг тагнадаг болохоос би сэтгүүлчдийг тагнаж байсан тохиолдол миний амьдралд байхгүй” хэмээн мэдэгдээд байгаа юм.

Товчхон

- Оросын  Засгийн газрын орлогч, ОХУ-ын Ерөнхийлөгчийн Алс Дорнод тойрог дахь бүрэн эрхт төлөөлөгч Ю.П.Трутнев  Монгол Улсад айлчилж төрийн гурван өндөрлөгтэй уулзав.

-Бүгд Найрамдах Энэтхэг Улсын Гадаад хэргийн сайд Сушма Сваражийн Монгол Улсад хийсэн албан ёсны айлчлал амжилттай өндөрлөлөө.

- Монгол Улсын Шадар сайд, Монгол, Оросын Засгийн газар хоорондын комиссын Монголын хэсгийн дарга Ө.Энхтүвшин ОХУ-ын Байгалийн нөөц, экологийн сайд, Орос, Монголын ЗГХК-ын Оросын хэсгийн дарга С.Е.Донскойг Төрийн ордонд хүлээн авч уулзав.