Дэлхийд данстай томоохон ордын нэг Оюутолгойг тойрсон маргаан ид дундаа өрнөж байна. Гэрээ байгуулахаас авахуулаад оролцсон нөхдүүдийг ч шалгаж байгаа юм. Уг төсөлтэй холбогдуулж нэлээд олон төрийн өндөр албан тушаал хашиж байсан хүмүүсийг хориод амжсан. Гэвч өнөөг хүртэл хорьж байгаа, зарим нэгнийх нь лагшин муудсан гэхээс өөр мэдээлэл огт байхгүй яваа. Ямартай ч С.Баярын бие огцом муудсан сурагтай. Тэгвэл эрхээ хязгаарлуулсан нөхдийг үргэлжлүүлэн хорих уу гэсэн асуулт урган гараад буй. 

Албан ёсны мэдээллээс харвал ЗГХЭГ-ын дарга асан С.Баярцогт, Татварын ерөнхий газрын даргаар ажиллаж байсан Б.Ариунсан, "Эрдэнэс Монгол" ХХК-ийн Гүйцэтгэх захирал асан Б.Бямбасайхан нарыг АТГ-аас Оюутолгойн төсөлтэй холбогдуулж “Батлагдсан гэрээ эрх зүйн баримт бичгүүдийг батлахдаа эрх мэдэл албан тушаалаа урвуулан ашиглаж илт хууль бус шийдвэр гаргаж бусдад давуу байдал олгосон байж болзошгүй” гэх хэрэгт буруутган шалгаж байгаа. Дээрх эрхмүүдийн эрхийг яхзгаарлаж, нийгмээс тусгаарлан ШШГЕГ-ын харьяа цагдан хорих 461 дүгээр ангид саатуулж буй. Эрхэм дээдсүүд асан нөхдийн хоригдох хугацаа дуусч байгаа тул прокуророос шүүхэд хүсэлт хүргүүлжээ.

Тодруулбал, Оюутолгойн гэрээнд голлох үүрэгтэй ЗГХЭГ-ын дарга асан С.Баярцогт, "Эрдэнэс Монгол" ХХК-ийн Гүйцэтгэх захирал асан Б.Бямбасайхан нарыг үргэлжлүүлэн хорих хүсэлт гаргасан байна. Тэдний хорих хугацааг сунгах эсэхийг шийдэх шүүх хурал маргааш 09.30 цагт Чингэлтэй дүүргийн Эрүүгийн хэргийн анхан шатны шүүхэд болно. 

Харин Татварын ерөнхий газрын даргаар ажиллаж байсан Б.Ариунсанг цааш үргэлжлүүлэн хорих уу, үгүй юу гэдэг тодорхойгүй байна.