АТГ-ын даргыг тодруулах марафон явагдаж байгаа билээ. Тус газрыг хэн толгойлж, авлигын аварга мангасуудтай тэмцэх бол гэсэн хүлээлт нийгэмд  үүсчихсэн явна. Гэхдээ өнөөгийн дарга хатуу хэмээх хочит Х.Энхжаргалыг хэрхэн халах нь ч сонирхол татсан хэвээр. Өмнөх дарга өөрийн хүсэлтээр ажлаа өгч байсан түүхтэй. Үүнтэй адил ажлаа өгөх үү гэсэн асуулт бий. Ямартай тус газрыг толгойлох эрхмийг тодруулах марафон амжилттай явагдаж, өндөрлөлөө. 

Өөрөөр хэлбэл, Авлигын эсрэг хуулийн 21 дүгээр зүйлийн 21.1 дэх хэсэгт “Авлигатай тэмцэх газрын дарга, дэд даргыг Монгол Улсын Ерөнхийлөгчийн санал болгосноор Улсын Их Хурал 6 жилийн хугацаагаар томилно”, 21 дүгээр зүйлийн 21.5 дахь хэсэгт “Авлигатай тэмцэх газрын дарга, дэд дарга нөхөн томилогдвол түүний бүрэн эрх нь томилогдсон өдрөөс эхлэн энэ хуулийн 21.1-д заасан бүрэн эрхийн хугацаа дуустал үргэлжилнэ” гэж тус тус заасан байдаг.

Ерөнхийлөгч Х.Баттулга хуульд заасан энэхүү бүрэн эрхийнхээ дагуу АТГ-ын дарга болон дэд даргыг УИХ-д санал болгохдоо иргэдийн саналаар тодруулахаар болсон. Тэгвэл Ерөнхийлөгчийн Тамгын газрын албан ёсны www.president.mn цахим хуудсаар явуулсан санал хураалт долоо хоногийн хугацаанд үргэлжилж, өчигдөр 22:00 цагт хаагдав. 

Иргэдээс ирүүлсэн, дэмжлэг авсан саналыг ажлын хэсэг нэгтгэж эхэлсэн байна. Тэд ирсэн санал хүсэлттэй нэг бүрчлэн танилцаж, эцсийн дүнгээ нэгтгэж дууссаны дараа АТГ-ын дарга, дэд даргад нэр дэвшүүлэх асуудлаар албан ёсны мэдээлэл өгөхөөр болжээ. 

Ямартай ч анх удаа иргэдийн оролцоотойгоор төрийн томоохон албан тушаалын эзнийг тодруулж байна. Эцсийн дүндээ хэн гэдэг эрхэм ноёнтон авлигын акулуудтай тэмцэхээр АТГ-ын даргын сэнтийд залрах юм бол гэсэн хүлээлт үүслээ.