Өнгөрсөн даваа гарагт “Цензургүй яриа” нэвтрүүлгээр Увс аймгийн Бөхмөрөн сумын нутагт байдаг Хотгор шанагын уурхайн лицензийг солонгосуудад худалдсан гэсэн нэвтрүүлэг гарсан. Хэдийгээр энэ нэвтрүүлгээр Сангийн сайд Ч.Хүрэлбаатар хийгээд түүний ах дүү нарыг энэ уурхайг худалдсан болгож харагдуулахыг зорьсон боловч энэ нь төд удалгүй баримтаар няцаагдсан юм. Учир нь нэвтрүүлэг гарсны дараа уг арилжаанд нэр холбогдсон хэмээн гүтгэгдсэн Ч.Гантулга өөрийн цахим хуудсаар дамжуулан баримт дэлгэсэн юм. Үүнээс харахад уурхайн лицензийг тус компанийн 70 хувийг эзэмшигч Б.Алтангэрэл солонгосын талд худалдсан гэдэг нь зээлийн гэрээ болон уг зээлийн гэрээнээс орж ирсэн албан татварын хуулгаас харагдаж буй. Орлогын албан татвараа тушаагаагүй хэмээн “Цензургүй яриа” нэвтрүүлгээр ярьсан ч энэ нь мөн л гүтгэлэг болохыг татварт тушаасан банкны шилжүүлгийн баримтаар иргэн Ч.Гантулга няцаажээ.

Түүнчлэн Хотгор шанагын лицензийн арилжаанд нэр холбогдсон “Кореан коал” компани “Ч.Хүрэлбаатартай ярилцсан, хэлэлцсэн, туслалцаа авсан зүйл огт үгүй” гэдгийг албан бичгээр ирүүлснийг ч мөн дэлгэн харуулсан байв. Үүнээс харахад Хотгор шанагын эзэнд Ч.Хүрэлбаатарын ах нар мөнгө зээлдүүлсэн болохоос биш лиценз арилжигчид огтоос биш гэдэг нь үнэн ажээ. 
Дашрамд дурдахад мөн л нэвтрүүлэгт дурдсан нүүрсний хийн цахилгаан станцыг 2006 онд байгуулсан байдаг. Тухайн үед Б.Эрдэнэсүрэн гишүүн тойрогтоо энэ ажлыг санаачлан хийсэн байдаг юм.