Нийслэлийн МАН-ын хорооны дарга Ц.Сандуй  албан тушаалаасаа чөлөөлөгдсөнөөр МАН-ын нийслэл хотын  хороо даргагүй болсон. Ингээд МАН-ын Удирдах зөвлөл хуучин даргыг нь чөлөөлж шинэ дарга сонгож томилох ажлыг зохион байгуулах үүргийг нийслэлийн МАН-ын хорооны тэргүүлэгчдэд өгсөн байдаг.

Үүний дагуу Нийслэлийн МАН-ын хорооны тэргүүлэгчид 2017 оны аравдугаар сарын 26-нд  хуралдаж шинэ даргаа сонгожээ. Хуралд оролцсон тэргүүлэгчид  100 хувийн саналаар нийслэлийн Засаг дарга бөгөөд Улаанбаатар хотын захирагч Су.Батболдыг нийслэлийн МАН-ын даргаар сонгохоор шийдвэрлэж үүрэг гүйцэтгэгчээр томилсон.  

Ийм жишиг олон улсад буй. Ерөнхийлөгчийн засаглалтай улс орноос бусдад нь  сонгуульд ялсан намын дарга нь гүйцэтгэх засаглалаа тэргүүлдэг.  Манайх ч эл жишгээр яваа. УИХ-ын сонгуульд намаа авч орон  үнэмлэхүй ялалт байгуулсан  МАН-ын дарга М.Энхболд хууль тогтоох дээд байгууллага УИХ-ын дарга болсон тул МАН-ын XXVIII Их хурал 2017 оны арваннэгдүгээр сарын 20-нд хуралдаж Ерөнхий сайд У.Хүрэлсүхийг олонхийн саналаар МАН-ын даргаар сонгосон билээ.  

Чухамдаа энэ нь  сонгуульд ялсан нам мөрийн хөтөлбөрөө хэрэгжүүлэхэд намынхаа бодлогыг гүйцэтгэх засаглалын шат бүхэнд гарч байгаа шийдвэр, авч хэрэгжүүлж байгаа ажил арга хэмжээ, бодлогодоо өдөр тутам тусгаж бодит ажил болгоход дөхөмтэй байдгаас тэр.

 Энэ утгаараа өнөөдөр МАН ялсан бүхий л аймагт Засаг дарга нь тухайн аймгийн МАН-ын дарга нь байгаа.

Харамсалтай нь Нийслэлийн МАН-н хорооны тэргүүлэгчид Засаг дарга бөгөөд Улаанбаатар хотын захирагч Су.Батболдыг МАН-ын даргын үүрэг гүйцэтгэгчээр томилсноос хойш бүтэн зургаан сар өнгөрөхөд намын Бага хурал нь хуралдалгүй, нийслэл хэмээх энэ том айлын эрх баригч нам албан ёсны даргатай болж  чадалгүй  өнөө хүрч байна.

МАН-ын Удирдах зөвлөлийн өгсөн үүргээр бол Нийслэлийн МАН-ын тэргүүлэгчид бага хурлаа аль 11, 12 дугаар сард, бүр хойшиллоо гэхэд оны эхээр зохион байгуулаад намын даргаа албан ёсоор сонгоод явах ёстой байсан юм.  Гэтэл яагаад ч юм нийслэлийн МАН-ын удирдах дээд байгууллага бага хурал нь хуралдалгүй зургаан сар гацаж байх хооронд 2016 оны сонгуулийн хугацаа талдаа орчихлоо...

Сонгуулийн хугацаа дуусаад дараагийн сонгууль тулаад ирэх, 2016 оны мөрийн хөтөлбөр дүгнэх болоход нам нь өнөө хүртэл албан ёсны даргагүй байгаа нийслэлийн Засаг дарга бөгөөд Улаанбаатар хотын захирагч С.Батболд юу хэлэх болж байна. Өнгөрсөн хугацаанд манай нийслэлийн нам даргагүй байснаас намын бодлого, мөрийн хөтөлбөр, Засаг даргын үйл ажиллагаагаа нэгтгэн зангидаж чадаагүй ээ, намын байгууллагаас удирдан чиглүүлэх явдал хангалтгүй байсаан гэх үү.

Ийм тул  олон улсын жишгийг дагасан ч, манайд уламжлагдаж ирсэнийг бодсон ч нийслэл хот маань гүйцэтгэх засаглалынхаа тэргүүн, Засаг дарга, Улаанбаатар хотынхоо захирагч С.Батболдыг намын даргаараа эртхэн сонгож томилоод үүрэх ачааг нь нэгмөсөн үүрүүлээд, 2020 онд “Та сонгуулийн хугацаанд намаа ч тэргүүлж байсан, гүйцэтгэх засаглалаа ч толгойлж байсан. Намынхаа мөрийн хөтөлбөрийг хэрхэн хэрэгжүүлэв” гээд сууж байсан нь дээр байх. Монголчууд ямбыг нь эдлүүл, ялыг нь ч үүрүүл гэдэг дээ. Лав эрхлүүл гэсэн үг биш. Бас эрх мэдлийг нь өг, тэгээд үр дүнг нь тооцож  хариуцлага нэх гэдэг дээ.

Зургаан сарын турш таг чиг байсан нийслэлийн МАН-ын Бага хурал хуралдах тухай өчигдрөөс   дуулдаж байгаагаас үзэхэд тун удахгүй тов нь гарах биз. МАН-ын дүрэмд зааснаар, бага хурал хуралдуулах тов зарласнаас хойш 30 хоногийн дотор хуралдана гэсэн байдаг  болохоор их бодоход ирэх сарын эхээр Нийслэлийн МАН-ын бага хурал хуралдаж даргаа сонгох бололтой.