Дэлхийд данстай томоохон орд Оюутолгойн баялгийн эзэд монголчууд бид. Гэвч баялгийнхаа эзэн нь болж хувирчихаад байгаа талаар маргаан хөвөрсөөр. Аль ч засаглалын үед хэрүүлийн алим дэлгэсэн Оюутолгойн гэрээний асуудал энэ парламентаар шийдвэрлэгдэнэ гэсэн хүлээлт үүсчихлээ.

УИХ-ын дарга М.Энхболд өнгөрсөн гуравдугаар сард захирамжилж “Оюутолгой ордыг ашиглах хөрөнгө оруулалтын гэрээний хэрэгжилтийг шалгаж санал, дүгнэлт гаргах” үүрэгтэй ажлын хэсэг байгуулсан. Эдийн засгийн байнгын хорооны дарга Д.Дамба-Очироор ахлуулсан ажлын хэсэг хэрхэн ажиллаж байгаа нь ч үл мэдэгдэнэ. Ямартай ч ойрын эх сурвалжийн мэдээлснээр ажлын хэсэг таван дэд ажлын хэсэг байгуулсан ч өнөөг хүртэл тодорхой гарт баригдаж, нүдэнд харагдахуйц зүйл хийгээгүй аж. Хоёр сарын хугацаа өнгөрсөн ч өдгөө олигтой зүйл хийгээгүй учир цаашид нааштай дүгнэлт ч гарахгүй бололтой. Үүнийг дэд ажлын хэсгийн гишүүн хэлж байгаа. Бүр өнөөг хүртэл гэрээтэйгээ ч танилцаагүй, яг юуг хэрхэн шалгахаа ч яриагүй явааг дуулгасан.

Хийсэн ажил хэлэх үггүй суугаа ажлын хэсгийн ахлагч Д.Дамба-Очир гишүүн долоо хоног гадагшаа хуралд явах гэж байгаа тул ажлын хэсгийг түр хугацаанд даргалах гишүүн томилж өгөхийг УИХ-ын даргаас хүсчээ. Долоо хоног ахлагчаар ажиллах эрхэм хэн байх бол гэсэн таамаг өнөөдөр уралдаж байна. Тэгвэл дэд ахлагч УИХ-ын гишүүн Д.Тэрбишдагва долоо хоног даргалах бололтой. 

Урагштай ажил хийгээгүй, нааштай шийдвэр гаргахгүй ажлын хэсгийнхэн гэж цоллуулах тэд үлдсэн хугацааг ийм маягаар аргацаах шинжтэй. Магадгүй дэд ажлын хэсгийнхний хойрго, дампуу байдал нэлээд гомдол дагуулах нь гарцаагүй биз ээ.