Нийслэлийн МАН-ын хорооны тэргүүлэгчид өнөөдөр хуралдаж, бага хурлын товоо тогтлоо. Нийслэлийн МАН-ын 34-р бага хурлыг 6-р сарын 7-нд хуралдуулж, 369 төлөөлөгч оролцуулахаар  тэргүүлэгчид санал нэгдсэн байна.  Хурлыг зохион байгуулах ажлын хэсгийг  байгуулж, хэлэлцэх асуудлын дарааллаа ч баталжээ. Нийслэлийн МАН-ын хорооны  34-р бага хурлаар   тус намын  хорооны  болон хяналтын хорооны тайлан, зохион байгуулалтын асуудал буюу МАН-ын даргын асуудал хэлэлцэнэ.  

Уг бага хурлыг   МАН- ын гишүүд   Нийслэлийн МАН- ын хорооны даргын үүрэг гүйцэтгэгч  С. Батболдыг  намын хорооны даргын албан тушаалд нь баталгаажуулах хурал  болно гэж   харж байна.  Учир нь  Нийслэлийн Засаг дарга бөгөөд  Улаанбаатар хотын захирагч нь  намын хороогоо удирдсанаар   2016 оны сонгуулийн  амлалтаа  биелүүлэх боломжтой.  Нөгөө талаар  өнгөрсөн намар хуралдсан МАН -ын  28- р их хурлаар   тус нам нэг бодлого, нэгдсэн удирдлагаар  зангидсан гар шиг ажиллана гэж  тунхагласан. Энэ утгаараа  нийт хүн амын 50 гаруй хувь нь ажиллаж , амьдарч байгаа   Улаанбаатар хотод улс төрийн хөдөлгөөн хийхгүй гэж эх сурвалжууд үзэж байна.   Засгийн газар нь ч тогтвортой, хот нь тогтвортой байж гэмээнэ  МАН    2020 оны сонгуульд амжилттай оролцох магадлалтайг  улс  төр судлаач, ажиглагчид  дүгнэдэг. Иймд аймаг, нийслэлийн МАН -ын хороодоос   Улаанбаатар хотын намын хороо хамгийн түрүүнд бага хурлаа товлон зарлалаа. 

Нийслэлийн МАН-ын хорооны тэргүүлэгчдэд  УИХ-ын гишүүд, Нийслэлийн Хурлын зарим төлөөлөгчид болон дүүргийн намын хорооны төлөөлөл багтдаг байна.