Авлигын акулуудтай тэмцэх байгууллагын одоогийн даргыг үүрэгт ажлаас нь чөлөөлж, оронд олон нийтийн санал асуулгаар өндөр үнэлэмж авсан хүнийг тохоон томилох асуудал яригдаж байгаа. Санал асуулгын дүн гарч АТГ-ын дарга, дэд даргад нэр дэвших хүмүүс ч тодорхой болчихсон яваа. Уг асуудлыг өчигдөр өрнөсөн намын бүлгүүдийн хурлаар хэлэлцэн АН дэмжиж, МАН татгалзсан санал гаргасан юм. Тэгвэл өнөөдөр Хууль зүйн байнгын хорооны хуралдаанаар АТГ-ын даргыг томилох асуудлыг хэлэлцлээ.

Тодруулбал, Монгол Улсын Ерөнхийлөгчөөс 2018 оны тавдугаар сарын 03-ны өдөр “Нэр дэвшүүлэх тухай” санал хүргүүлсэн. Энэ нь, МАН-ын 65 гишүүнд таалагдахгүй байгаа юм. Тиймээс эсрэг саналтай байгаа.

МАН-ын бүлгийн гишүүн Л.Мөнхбаатар “Авилгатай тэмцэх газрын дарга, дэд даргыг томилох Ерөнхийлөгчийн санал нь хууль зөрчсөн гэж үзэж байна. Авлигын эсрэг хуульд Авлигатай тэмцэх газрын дарга, дэд даргыг чөлөөлөх, огцруулахтай холбоотой зохицуулалтыг тусгасан. Эдгээр албан тушаалтнууд нь гэмт хэрэг үйлдсэн нь нотлогдож, шүүхээр тогтоогдсон бол албан тушаалаас огцруулсанд тооцох зохицуулалттай. Одоогоор Авлигатай тэмцэх газрын дарга Х.Энхжаргал, дэд дарга Ц.Нямдорж нар өөрсдөө хүсэлт гаргаагүй. Эрүүл мэндийн хувьд ч ажил үүргээ гүйцэтгэх боломжтой байгаа гэж ойлгож байна. Түүнчлэн эдгээр албан тушаалтнуудын бүрэн эрхийн хугацаа дуусаагүй байгаа” гэж хэлсэн юм.

Мөн хуулийн хугацаа нь томилогдсон өдрөөс хойш зургаан жил байх ёстой гэдэг хуулийн заалтыг хэрэгжүүлэхгүй байгаа нь алдаа аж. Иймээс тус газрын дарга Х.Энхжаргал, дэд дарга Ц.Нямдорж нарын бүрэн эрхийг хэлэлцэх хууль зүйн хувьд боломжгүй гэсэн тайлбарыг хийлээ.

Магадгүй Байнгын хороо уг саналыг хэлэлцэж, тодорхой санал, дүгнэлт гаргавал парламент өөрөө Үндсэн хуулиас авахуулаад холбогдох бүх хуулиа зөрчих эрсдэлтэй гэдгийг гишүүд санууллаа. Ерөнхийдөө Монгол Улсын Ерөнхийлөгчийн саналыг хэлэлцэх шаардлагагүй гэж МАН-ын гишүүд үзсэн юм. 

Багагүй маргаж, санал хэлсний дараа “хэлэлцэх шаардлагагүй” гэсэн горимын санал гаргалаа. Хуралдаанд оролцсон 15 гишүүний 80 хувь нь уг саналыг дэмжсэнээр төрийн тэргүүний ирүүлсэн асуудлыг хэлэлцэхээс татгалзлаа.