Ерөнхий сайд асан С.Баяр, Ч.Сайханбилэг нарыг үргэлжлүүлэн хорих эсэх асуудлыг  Нийслэлийн Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд өнөөдөр шийднэ.

Тэднийг баривчлан цагдан хорих 30 хоногийн хугацаа нь дуусч байгаа тул үргэлжлүүлж хорих саналыг Прокурорын газраас шүүхэд ирүүлсэн юм.

Оюутолгой, Дубайн гэрээтэй холбоотойгоор Авлигатай тэмцэх газар тэднээс  мэдүүлэг авах явцдаа хорих шаардлагатай гэж үзсэн юм. Үндэслэлдээ гэмт хэргийн ул мөр нотлох баримтыг үрэгдүүлэх, зөөвөрлөх, устгаж болзошгүй гэж үзсэнийг прокурор хянаж, шүүх хүлээн авсан гэдэг.

Харин Ерөнхий сайд асан С.Баярын өмгөөлөгч А.Ариунаа “Оюутолгойн гэрээтэй холбоотой бүх баримт материалууд Засгийн газрын хэрэг эрхлэх газрын архив, УИХ-ын архив, Үндэсний аюулгүй зөвлөлийн архивд байсаар атал нотлох баримтуудыг зөөвөрлөх устгах, үрэгдүүлэх боломжтой нөхцөл үүсэж болзошгүй гэсэн үндэслэлээр баривчилсан нь хууль зүйн үндэслэлгүй” гэж хэлсэн.

Харин Ерөнхий сайд асан Ч.Сайханбилэгийн өмгөөлөгч Л.Данзанноров “Төрийн тусгай хамгаалалт нь буугаагүй, бүрэн эрхийн хугацаа нь дөрвөн жилийн хугацаанд хадгалагдах ёстой хүнийг баривчлан саатуулсан нь Монгол Улсын хэд хэдэн хуулийг зөрчсөн үйлдэл болсон” гэсэн тайлбар хийж байв.