Монгол Улсын хуулийн байгууллага  булан тохой, үзүүр хавиасаа эрүүлжих маягтай болж, ягаарч эхэлсний жишээ нь Хууль зүй, дотоод хэргийн сайд Ц.Нямдоржийг ТЕГ дуудсан явдал.  Хуулиа мэддэг, зангарагтай улстөрчийн хувьд тэрбээр “Би салбарын тань сайд байна. Мэдүүлэг авах  гэж байгаа юм бол  миний өрөөнд ирээд ав” хэмээн томорч болох байсан ч тэгсэнгүй, дуудсан цагт нь гүйгээд очсон байна. Эл үйлдэл түүнийг хэн болохыг ард түмэнд тод харуулав. Бас нэр хүнд, байр суурийг нь улам өсгөж орхив. Хэрэгт дуртай нэг нь  Ц.Нямдорж сайдыг юуны учир дуудсан юм бол хэмээн соошл ертөнцөөр бэдэрч байж мэднэ. Тэгвэл энэ талаар асуусан сэтгүүлчийн асуултад тэрбээр “ Би хуулиа хүндэтгэж  ТЕГ-т өчигдөр  очсон нь үнэн.  Гэхдээ би мэдүүлэг өгөөгүй. Яагаад гэвэл надад гэрчлэх асуудал байхгүй. Сэтгүүлчдийг тагнаж, чагнасан асуудал байхгүй. Намайг тагнуулсан, чагнуулсан гээд байгаа юм бол баримтаа гаргаж ир” гэж хэлсэн хэмээн тайлбарлажээ. Монгол Улсын Ерөнхийлөгч Ц.Элбэгдорж нэгтээ та нар "Хууль дуудсан цагт костюм өмсч,  зангиагаа зүүсээр очих ёстой" хэмээсэн удаатай.

 Ч.Чулуун