УИХ-ын чуулганы пүрэв гарагийн  нэгдсэн хуралдаанаар Гаалийн албан татвараас чөлөөлөх тухай,  Нэмэгдсэн өртгийн албан татвараас чөлөөлөх тухай хуулийн төслүүдийг эцэслэн хэлэлцээд Нэмэгдсэн өртгийн албан татвараас чөлөөлөх тухай хуулийн төслийг хуралдаанд оролцсон 50 гишүүний 62 хувь нь дэмжиж баталлаа.

 Төсвийн байнгын хорооны санал, дүгнэлтийг УИХ-ын гишүүн О.Батнасан танилцуулсан. Гаалийн албан татвараас чөлөөлөх тухай хуулийн төслийг эцсийн хэлэлцүүлэгт бэлтгэхдээ хуулийн дагаж мөрдөх хугацааг 2019 оны нэгдүгээр сарын 01-ний өдөр байхаар тусгажээ.

Энэ хуулиудыг баталснаар импортоор оруулж ирж байгаа тууш чиглэлийн нимгэн давхаргатай хавтан (OSB), стандартын дагуу хийсэн, угсрахад бэлэн модон барилгын угсармал хийц, гуалингаас бусад бүх төрлийн түлшний зориулалттай модыг гаалийн албан татвараас чөлөөлөхөөр хуульчлав.

Мөн ойжуулах, цэцэрлэгжүүлэх, ойн аж ахуйн арга хэмжээний ажилд зориулан  импортоор оруулж ирж буй тууш чиглэлийн нимгэн давхаргатай хавтан (OSB), стандартын дагуу хийгдсэн, угсрахад бэлэн модон барилгын угсармал хийц, гуалингаас бусад бүх төрлийн түлшний зориулалттай модыг нэмэгдэл өртгийн албан татавараас 2022 оны арванхоёрдугаар сарын 31-ний өдрийг хүртэл тус тус чөлөөлөх юм.