Оюутолгойн гэрээнд шалгалт ажлын хэсэг байгуулах захирамжыг УИХ-ын дарга М.Энхболд гаргаснаас хойш хоёр сарын хугацаа өнгөрч байна. Гэвч уг ажлын хэсэг ямар дүр зурагтайгаар юу бүтээсэн нь өнөөг хүртэл тодорхойгүй яваа. Ахлаж байсан Эдийн засгийн байнгын хорооны дарга Д.Дамба-Очир гишүүн ч таг чиг. Тэрбээр энэхүү ажлын хэсгийг ахлахаас татгалзсан тухай мэдээлэл бий. Тэгвэл парламентын өнөөдөрийн чуулганы нэгдсэн хуралдаанаар ажлын хэсгийн ахлагчийг өөрчлөхөөр болсон юм. 

УИХ-ын даргын Захирамжид нэмэлт, өөрчлөлт оруулах тухай захирамж гаргаж, “Оюутолгой ордыг ашиглах хөрөнгө оруулалтын гэрээний хэрэгжилтийг шалгаж санал, дүгнэлт гаргах” үүрэг бүхий Ажлын хэсгийн ахлагч Д.Дамба-Очирыг чөлөөлж, оронд нь Д.Тэрбишдагва гишүүнийг томилохоор шийдвэрлэлээ. 

Мөн ажлын хэсгийн бүрэлдэхүүнийг өргөтгөн УИХ-ын гишүүн Т.Аюурсайхан, Ж.Батзандан, Х.Болорчулуун, Д.Ганболд, М.Оюунчимэг нарыг нэмж томилохоор шийдвэрлэв. 

Монгол Улсын Их Хурлын даргын 2018 оны гуравдугаар сарын 23-нд гаргасан захирамжийн дагуу “Оюутолгой ордыг ашиглах хөрөнгө оруулалтын гэрээний хэрэгжилтийг шалгаж санал, дүгнэлт гаргах” үүрэг бүхий Ажлын хэсгийн бүрэлдэхүүнд УИХ-ын гишүүн Н.Амарзаяа, О.Баасанхүү, Б.Бат-Эрдэнэ, Б.Жавхлан, З.Нарантуяа, Я.Содбаатар, А.Ундраа нар ажиллаж байна.