Шүүхийн шийдвэр гүйцэтгэх ерөнхий газрын харьяа урьдчилан хорих 261 дүгээр ангид саатуулагдаад байгаа, Монгол Улсын Ерөнхий сайд асан Санжийн Баярын бие муудсан учраас, сайд нарын хоёрдугаар эмнэлэгт хүргэхээр болсон хэмээн эх сурвалж мэдээллээ. Түүнийг саатуулан хорьсноос хойш 42 хоног өнгөрөөд байхад  өмгөөлөгч нь С.Баярын биеийн байдал эрс муудаж хөл дээрээ алхаж чадахгүй болсон гэж мэдээлсэн юм.  С.Баярын ужиг тулай өвчин нь хүндэрч хөл нь шагайнаасаа доош хавдсан, алхаж чадахгүй байсан учраас 461-р ангийн эмнэлэгт хэвтэн, эмчлүүлж байсан юм. Гэхдээ С.Баяр батлан даалтад гарах хүсэлгүй байгаагаа хэлсэн гэсэн мэдээлэл бас байгаа юм.  Гэвч биеийн байдал нь хүндэрсэн учраас ийнхүү II эмнэлэгт хүргэж, эмчлүүлэхээр болсон талаар эх сурвалж мэдээллээ.

Мөн Урьдчилан хорих газарт агаар дутмаг, тоосжилт их байгаагаас үүдэн багтраа нь хүндэрсэн байна. Тэрбээр сүүлийн 20 гаруй хоногийн хугацаанд хорих ангийн эмнэлэгт хэвтэж байгаа гэдэг мэдээлэл бий. Түүнийг анхлан хорьсон 30 хоногийн хугацаа нь дуусахад шүүхээс хорихгүйгээр байцааж мэдүүлэг авах шийдвэр гаргасан ч прокурорын эсэргүүцлээр тэр өдөр нь шүүх дахин хуралдаж  С.Баяр, Ч.Сайханбилэг, Б.Бадрал нарыг хорих хугацааг нь сунгах шийдвэр гаргасан юм.