Ж.Эрдэнэбатын Засгийн газрын үед “УБТЗ” ХНН актлагдсан 1000 вагон оруулж ирсэн тухай мэдээлэл сүүлийн үед ил болоод байгаа. Өөрөөр хэлбэл, ОХУ ашиглах боломжгүй гээд актласан байсан вагонуудыг “УБТЗ” авсан гэсэн үг юм. Насжилтын тоо нь манай улсад мөрдөж байгаа журмаас хэтэрсэн энэ вагонуудыг оруулж ирэхэд Зам, тээврийн хөгжлийн дэд сайд Б.Цогтгэрэлийг холбоотой хэмээн хэвлэлийн хурал саяхан хийж байсан. Харин Зам, тээврийн хөгжлийн сайд Ж.Бат-Эрдэнэ өнөөдөр хэвлэлд өгсөн ярилцлагадаа уг асуудалд дэд сайдыгаа холбоогүй хэмээжээ. Тэрбээр ярилцлагадаа, “Энэ нь дэд сайдын хийсэн ажил гэхээсээ илүү тухайн үеийнх нь сайдын шийдвэр. Дэд сайд Монгол талаа л тэнд төлөөлж очиж байгаа. Эндээс удирдамжийг сайд шууд байдлаар төлөөлдөг. Төрийн өмч гэдэг утгаараа сайд нь нэг ёсондоо хувь эзэмшигч болчихдог. Тиймээс сайд л бүх удирдамжийг өгнө. Тэгэхээр актлагдсан 1000 вагон авсан асуудал Б.Цогтгэрэлд биш Д.Ганбатад хамаарна” гэсэн юм.  

                                                                                                                                                            С.Нацаг