Улсын Их Хурлын Хууль зүйн байнгын хорооноос энэ оны хаврын улиралд хийсэн ажлын тайланг өнөөдөр танилцууллаа. Хууль зүйн байнгын хороо тайлангийн хугацаанд нийт 12 удаа хуралдсанаас 43 асуудлыг хэлэлцэн шийдвэрлэжээ.

Байнгын хорооны хуралдаанаар 28 хуулийн төсөл, УИХ-ын тогтоолын төсөл 16, Үндсэн хуулийн цэцийн дүгнэлт 3, хяналт шалгалтын тайлан 1, харьяа яам, агентлагийн тайлан 2, албан тушаалтныг томилох, чөлөөлөх тухай асуудал 5, Байнгын хорооны санал дүгнэлт 31, танилцуулга 6, зарчмын зөрүүтэй 19 томъёолол зэрэг тус тус бэлтгэн Улсын Их Хурлын чуулганы нэгдсэн хуралдаанаар хэлэлцэн шийдвэрлүүлсэн байна. Мөн Улсын бүртгэлийн ерөнхий хууль, Иргэний улсын бүртгэлийн тухай хууль, Хуулийн этгээдийн улсын бүртгэлийн тухай зэрэг хэд хэдэн хуулийн шинэчилсэн найруулгын төсөл болон холбогдох бусад хуулийн төсөлд ажлын хэсэг гарган ажиллаж байна.   

Түүнчлэн төр, нийгмийн зүтгэлтэн С.Зоригийн амь насыг хөнөөсөн хэргийн талаар УИХ-ын түр хороо байгуулжээ. УИХ-ын гишүүн, Монгол улсын их хурлын Байнгын хорооны дарга Ш.Раднаасэд “Энэ асуудлыг шалгахын тулд Хууль зүйн байнгын хороо дангаараа шалгаж болохгүй байгаа учраас тусгай хяналтын дэд хороо байгуулж, гүйцэтгэлтийн шугамаар нууц мэдээлэлтэй танилцах ёстой.  Тодорхой нэг асуудлыг шийдвэрлэхийн тулд түр хороо байгууулж болно гэсэн заалттай байдаг. Ингэснээр Улсын Их хурал  С.Зоригийн амь насыг хөнөөсөн хэргийг өөрийн анхааралдаа авч байна гэсэн үг” хэмээн онцлон хэлсэн юм.

Мөн 60 тэрбумын хэргийн талаарх үнэн худал эсэх мэдээллийг иргэд хүлээсээр байгаа. Тэгвэл  УИХ-ын 19 гишүүний санаачилсан нээлттэй сонсгол зохиох тухай  бичгийг Улсын Ерөнхий Прокурорын газарт хүргүүлжээ. Ерөнхий Прокурорт хүргүүлсэн албан бичгийн хариу 30 хүртэлх хоногийн дотор багтаж ирэх хуулийн заалттай байдаг байна.   

Б.Цэрэнлхам