Монгол Улсын Ерөнхийлөгчийн зарлигаар Улаанбаатар хотын Олон улсын нисэх онгоцны шинэ буудлын Хүний нөөц, ашиглалт, менежментийн чадавхийг сайжруулах төслийн ахлах зөвлөх Кихара Масатомог “Найрамдал” медалиар шагнажээ.
Шагналыг Тамгын газрын дэд дарга Г.Байгалмаа Засгийн газрын төрийн ёслол хүндэтгэлийн танхимд гардуулсан байна.
Масатомо Кихара нь 2007 онд Японы Засгийн газрын хөнгөлттэй зээлийг хэрэгжүүлэх судалгааны багийн гишүүнээр манай улсад анх ирж одоогийн нисэх буудлын нөхцөл байдал, шинэ нисэх буудлын хэрэгцээ шаардлагыг тодорхойлж, 2010 он хүртэл ЖАЙКА-ын төлөөллөөр Улаанбаатар хотын Олон улсын шинэ нисэх буудлын анхны төлөвлөгөө зураг дизайныг батлахад гар бие оролцож байжээ.
Мөн Японы Зам тээвэр, аялал жуулчлалын яамны сайдыг Монголд айлчлах үеэр дагалдан ирж хоёр орны хамтын ажиллагаа болон найрамдлын бэлэг тэмдэг болсон шинэ нисэх буудлын төслийг хэрэгжүүлж эхлэхэд хувь нэмэр оруулсан байна.
Харин 2015 онд Монгол Улсын Засгийн газрын хүсэлтээр хэрэгжиж эхэлсэн ЖАЙКА-ын Техникийн Хамтын Ажиллагааны төсөл болох “Улаанбаатар хотын Олон улсын нисэх онгоцны шинэ буудлын хүний нөөц, ашиглалт, менежментийн чадавхийг сайжруулах төсөл”-ийн ахлах зөвлөхөөр томилогджээ.
Б.Лхам
