УИХ-ын гишүүн О.Баасанхүү Ерөнхий сайдад гурван асуулга тавьжээ. Тодруулбал, ““Жаст групп” ХХК нь “Эрдэнэт үйлдвэр” ХХК-ийн төрийн өмчлөлийн 51 хувийг зээлийн баталгаа гаргаж Өмнөд Африкийн Стандарт банкнаас зээл авсан гэх асуудал Английн Арбитрын шүүхээр өнөөгийн байдлаар бүрэн эцэслэн шийдвэрлэгдсэн эсэх,

Арбитрын шүүхээс Эрдэнэт үйлдвэрийн удирдлагууд болон компанийн өмч хөрөнгө, үйл ажиллагаатай холбоотой ямар шийдвэр гарсан. Тухайн шийдвэрийн үр дүнг хэрхэн үзэж байгаа талаар,

Монгол улсад онц их хэмжээний хохирол учруулж, Эрдэнэт үйлдвэрийг өрөнд оруулсан этгээдүүдэд ямар арга хэмжээ авах гэж байгаа талаар болон Эрдэнэт үйлдвэрийг хохиролгүй болгох талаар төлөвлөгөө, төсөл боловсруулсан эсэх зэрэг асуудлыг тодорхой болгон хариу ирүүлэх” гэжээ.

Тэрбээр асуулгыг хариуг Улсын Их Хурлын ээлжит болон ээлжит бус чуулганаар нэн яаралтай горимоор сонсгохыг Ерөнхий сайдаас хүссэн байна.

Б.Лхам