Турк, Монголын хамтарсан “Улаанбаатар-Эмпати” сургуулийн захирал Вэйсел Акчайг гэрийнх нь гаднаас хулгайлсан тухай мэдээлэл долдугаар сарын 27-ны өдөр олон нийтийн сүлжээгээр цацагдсан билээ. Түүнийг үл таних хүмүүс тухайн өдрийн 10 цагийн орчимд гэрээсээ гарч явахад нь барьж авч, саарал өнгийн “Toyota Alphard” маркийн автомашинд суулган, нүдийг нь боон, есөн цаг орчим хад чулуутай, донсолгоо бүхий замтай газраар авч явсан тухай Вэйсел Акчай маргааш өдөр нь  ярьсан. Уг өдөр БНТУ-ын онцгой элчийн “СТ 4010” дугаартай онгоц нисэх онгоцны буудал дээр буугаад байлаа.  Энэ нь Вэйсел Акчайг гүйцэтгэх ажиллагаа явуулан Турк уруу авч явах гэж байна гэсэн хардлагыг төрүүлээд байсан юм.

Хардлагыг гүнзгийрүүлж байгаа зүйл бол Туркийн элчин сайд  Ахмед Язалын хэвлэлд өгсөн тайлбар байлаа. 

Тэрбээр “Нууцаар ирсэн онгоц биш шүү дээ. ГХЯ-аас олгосон зөвшөөрлийн дагуу Улаанбаатарт буусан онгоц. Монголын талын зөвшөөрөл, мэдээлэлгүй байхад ямар нэгэн хууль бус үйл ажиллагаа явуулна гэж байхгүй гэдгийг дахин хэлмээр байна” гэж өөрийн байр сууриа илэрхийлсэн байна.

Түүний хэлснээр манай Гадаад харилцааны яам зөвшөөрлийг нь олгожээ. Харин хэн гэдэг эрхмийн зөвшөөрөл эсэхийг тэрээр дурдаагүй байна.

Харин зөвшөөрөл олгох эрх бүхий албан тушаалтны хамгийн түрүүнд  яамны сайд Д.Цогтбаатар нэрлэгдэнэ.

Учир нь Вэйсел Акчай хулгайлагдсаны дараагаар түүнийг “Чингис хаан” нисэх онгоцны буудал уруу авч явсан гэх мэдээллийн дагуу хэвлэлийнхэн нисэх онгоцны буудлыг зорьсон билээ. Тэр үед ирсэн онгоцонд хяналт тавьж, онцгой элчтэй уулзахаар Д.Цогтбаатар сайд тэнд хүрэлцэн очсон юм.

Ямартай ч Туркууд гүйцэтгэх ажиллагаа явуулжээ. Харин манайхан тус нэмрээ оруулсан байх вий дээ гэх хар төрөв.

Хулгайлагдсан гэх мэдээллийн дараагаар нийтлэлч Баабар өөрийн твиттер хуудсандаа “Түрэгийн түрүүний элчин сайд намайг элчин дээрээ урьж уулзаад түрэг сургуулийг хаах, захирлыг нь баривчлан шилжүүлэхэд тусалбал хувь хүний минь хувьд багагүй мөнгөөр урамшуулан шагнана гэж гуйж байлаа. Намайг юм бичиж олон түмний толгойг эргүүлж өгөөч гээд буй хэрэг л дээ”, “ Түрэгээс хоёр тийрэлтэт онгоц түүнийг ачихаар ирж түүнийг хулгайлаагүй бид хүлээлгэж өгч буй бололтой” гэх мэтээр жиргэсэн юм.

Харин энэ талаар ХЗДХ-ийн яамны сайд Ц.Нямдоржоос тодруулахад "Хулгайлагдсан гэх хэргийн дагуу холбогдох байгууллагууд нь шалгаж байгаа. Манай тагнуулын байгууллагаас оролцсон гэсэн хардлага ч байгаа шүү дээ” гэсэн юм.

Ямартай ч энэ хэргийн үнэн мөнийг илрүүлэх бололтой. Харин үнэн зөвөөр нь дэлгээсэй гэж л хүсье.

Л.Сайнбаяр