Монгол ардын хувьсгалт нам, Иргэний Зориг ногоон нам, Монголын ногоон нам, Монголын Үндэсний Ардчилсан нам өнөөдөр хамтарсан мэдээлэл хийлээ.

Дээрх дөрвөн намууд хамтарсан мэдэгдэл гаргажээ. Тодруулбал, “МАНАН-гийн даалгавраар ИЗЗН намыг УИХ-ын 42-р тойргийн нөхөн сонгуулиар эзэн Чингисийн төрсөн нутгийнхан өөрсдөд нь муу дүн тавина хэмээн айсандаа Үндсэн хуулийн цэц мэт хууль, шүүхийн байгууллагынхныг ашиглан нөхөн сонгуулийг болгохгүй хэмээн улайран зүтгэж байна” хэмээн Монголын Ногоон Намын дарга О.Бум-Ялагч ярьсан юм. Тиймээс МАНАН эрх мэдлээ авч үлдэхийн тулд үхэн хатан зүтгэж өрсөлдөгч намууд, хүмүүсийг оролцуулахгүй байхын тулд элдвийн хиймэл саад бэрхшээл учруулсаар байна гэв.

Монголд амьдарч байгаа иргэнийг  хулгайлах, төрийн албанд ажиллаж байгаа хүнийг алах зэрэг аймшигт гэмт хэргүүд гарч түмэн олныг цочирдууллаа. Монголын төр сонгуулиас сонгуульд улам сульдан эзгүйрч зөвхөн нам дамжсан цөөн хэдхэн  бүлэглэлүүдийн хоорондын наанаа тэмцэж байгаа нэртэй жүжиглэдэг, цаагуураа үгсэн хуйвалдаж эх орон, ард түмнийхээ цадахаа мэдэхгүйгээр иддэг газар болон хувирч байна.

Түүнчлэн тэрбээр “УИХ-ын ээлжит бус чуулганыг хуралдуулж Оюутолгойн гэрээг цуцлах эсэх асуудлаар ард түмний дунд санал асуулга явуулах, шийдвэр гаргах, 60 тэрбумын луйвар булхайн талаар  олон нийтийн өмнө нээлттэй сонсгол зохион байгуулах зэрэг өнөөгийн  улстөр, нийгэм, эдийн засагт тулгамдсан асуудлуудыг яаралтай шийдвэрлэхгүй бол УИХ-ыг тараах санал асуулгыг улс орон даяар өрнүүлж  Хүчирхэг, Хүнлэг Монгол Улсаа сэргээн байгуулах үйл хэргийг эхлүүлэх болно гэдгээ хариуцлагатайгаар мэдэгдэж байна” хэмээн онцлон тэмдэглэсэн юм.

“МАНАН-гийн бүлэглэл аливаа сонгуульд хүнийг нь эсвэл намыг нь оролцуулахгүй гэж хасдаг боллоо. Бүр сүүлдээ сонгуулийг нь хасдаг байдлаар монголд өнөөдөр ардчилал, хариуцлагатай төр бий болгож чадахгүй. Нөхөн сонгуулийг яаралтай явуулж Хэнтий аймгийн 42-р тойргийн иргэдийг төлөөлөлттэй болгох хэрэгтэй” гэж МАХН-ын дарга Н.Энхбаяр ярьлаа.

Харин Иргэний Зориг ногоон намын дарга Ц.Ганхуяг “Манай намыг намынхаа зарлагын тайланг өгөөгүй гэдэг шалтгаанаар Сонгуулийн ерөнхий хороо бүртгэхээс татгалзсан. Энэ нь сонгох, сонгогдох эрхэнд ноцтой халдаж буй хэлбэр. Нэр дэвшигчийн болон намын зарлагын тайлан гэж хоёр төрөл. Манай намын нэр дэвшигч тухайн үед зарлагын тайлангаа аудитаар баталгаажуулаад хуулийн хугацаанд нь өгсөн байгаа юм” гэв.

Б.Лхам