Баянгол дүүргийн 20 дугаар хорооны нутаг дэвсгэрт БНХАУ-ын буцалтгүй тусламжийн хүрээнд 30 сая ам.долларын хөрөнгөөр “Хөгжлийн бэрхшээлтэй хүүхдийн хөгжлийн төв”-ийн барих ажлыг 2016 оны есдүгээр сараас эхлүүлсэн.
Уг төвийн ажлын үйл явцтай БНХАУ-ын Гадаад хэргийн сайд Ван И өчигдөр танилцлаа. Монгол Улсын Гадаад харилцааны сайд Д.Цогтбаатар, Хөдөлмөр, нийгмийн хамгааллын сайд С.Чинзориг, БГД-ийн Засаг дарга С.Одонтуяа болон бусад албаны хүмүүс хүлээн авч барилгын явц, бүтцийн талаар танилцуулав.
УИХ-ын гишүүн С.Эрдэнийн санаачлагаар баригдаж буй “Хөгжлийн бэрхшээлтэй хүүхдийн хөгжлийн төв”-ийн барилга нь 250 ортой, 14990 м2 талбай бүхий нэгдсэн зоорьтой, төмөр бетон каркасан гурван давхар барилга юм. БНХАУ-ын санхүүжилтээр уг төвийн барилга байгууламж, техник тоног төхөөрөмж, боловсон хүчнийг цогц байдлаар шийдвэрлэх, Монгол Улсын талаас барилгын гадна шугам, сүлжээ /гадна дулаан хангамж, гадна цэвэр ус дамжуулах шугам, ариутгах татуургын шугам, бохир усны насос станц, гадна цахилгаан, гадна холбоо/-ний ажлыг хийж гүйцэтгэхээр төсөлд тусгасан байна.
Барилгын ажлыг ирэх оны хоёрдугаар сард хүлээлгэн өгөхөөр төлөвлөж байгаа аж. Одоогоор барилгын ажлын явц 80 гаруй хувьтай байна.
