УИХ-ын гишүүн О.Баасанхүү угаасаа л дэд сайдын албан тушаалд дургүй. Өнгөрсөн жил тэрбээр дэд сайд нарын орон тоог хасъя, давхар дээлтэй сайд гишүүдийн цалинг нэг цалингаар нь тооцож олгож байя гэх зэрэг олон дэвшилтэт санаа дэвшүүлж байсан боловч УИХ дээр дэмжигдэж чадаагүй. Гэхдээ багагүй санал авч байлаа. Энэ жил дэд сайдгүй болох О.Баасанхүү гишүүний саналыг Ерөнхийлөгч Х.Баттулга дэмжиж энэ тухайгаа Ерөнхий сайдад шаардлага хүргүүлэээд байгаа.

Саяхан Ерөнхийлөгчийн Тамгын газрын дарга З.Энхболд дэд сайд нар дээр нэмэх нь аймаг, нийслэл, агентлагуудын хоёр байдаг орлогч, тэргүүн дэд даргын албан тушаалуудыг нэг нэгээр цөөрүүлж тэдний тусгай эрх ямбанд зориулдаг их хэмжээний төсөв мөнгийг хасах шаардлага хүргүүлсэн юм. Ерөнхийлөгч төсөвт санал илэрхийлэх боловч шаарддаггүй. Гэхдээ Ерөнхийлөгч Х.Баттулга шаардчихлаа. Ерөнхийлөгчийн шаардлагыг биелүүлэхгүй бол хориг тавина. Хоригийг УИХ-ын 1/3 хүлээгээд авахад л хүчин төгөлдөр болно. Эрх баригч МАН дэд сайд нараа явуулж чадахгүй 13 хүний эрх ашгийг дээдлэж явсаар энэ нь улам ч шахаанд орж газар авсаар аймгийн дэд дарга нар, агентлагийн дэд дарга нар руу халдаж эхэллээ. Бага чулуугаар том чулуу хөдөлгөн дэд сайд нараа явуулах тал дээр УИХ-ын гишүүд ч санал нэгтэй байгаа бөгөөд хамгийн их таашааж байгаа хүмүүс нь жинхэнэ сайд нар юм.

"Яам нэг толгойтой байх ёстой" гэх авч сайдын хүн, дэд сайдын хүн, Төрийн нарийн бичгийн даргын хүмүүс нэг дээвэр дор учраа олж чадахгүй ажил гацаж байгааг олон жишээ дурдан хэлж болно. Эрх баригч намын шүдний өвчин болсон дэдүүдээс салах уу, яах вэ гэдэг нь ирэх арваннэгдүгээр сарын 15-ны өдөр шийдэгдэх боллоо. Учир нь тэр өдөр ирэх оны Төсвийн тухай хуулийг батална.

С.Нацаг