"Эрдэнэт”-ийн экс захирал Ч.Ганзоригийг өчигдөр орой хуулийн байгууллагаас саатуулсан. Тус үйлдвэрийн 49 хувийг төрд авсан нь хууль зөрчсөн байна гэсэн Дээд шүүхийн шийдвэрийн дараахан болсон уг баривчилгаа Дээд шүүхийн шийдвэрийг зөвтгөж харагдуулах гэсэн бас нэгэн ташуур нь байж болох юм.

Учир нь, Ч.Ганзоригийг “Эрдэнэт”-ийн захирлаар ажиллаж байхдаа баталгаа гаргаж өгснөөр “Стандарт” банкинд “Эрдэнэт” үйлдвэрийг барьцаалах боломж Ш.Батхүүд олгосон гэж буруутгадаг билээ. Гэхдээ энэ хэрэг одоо ч эцэслэн шийдэгдээгүй, ээдрээтэй хэвээр байгаа юм. Хэдийгээр Лондоны Арбитрын шүүх 2016 оны есдүгээр сарын 20-нд “Стандарт” банкийг хохиролгүй болгох нэхэмжлэлийг хангасан шийдвэр гаргасан байдаг ч манай улсад энэ нь өнгөрсөн хаврыг хүртэл “нууц” хэвээр байсан. Харин өнгөрсөн хаврын чуулганы өмнөхөн гэнэт л Лондоны Арбиртрын шүүхийн шийдвэр албан мэдээгээр бус ам дамжин яригдаж эхэлсэн байдаг юм. Ингэхдээ Лондоны Арбиртын шүүхийн шийдвэрт дурдсанчлан “Эрдэнэт” үйлдвэрийн төлөх ёстой гэх 51 сая ам.долларын төлбөрийн хэмжээг даруй хоёр дахин ихээр нийгэмд мэддээллэсэн билээ. Энэ шийдвэрийг гаргахдаа Лондонб Арбитрын шүүх “Эрдэнэт” үйлдвэрт давж заалдах эрх олгосон байдаг юм. Харамсалтай нь “Эрдэнэт” үйлдвэр энэ эрхээсээ санаатай, санамсаргүй нь аль нь мэдэгдэхгүйгээр татгалзаж хуулийн хугацаагаа дуусгасан гэдэг нь Арбитрын шүүхэд “Эрдэнэт” ялагдсан мэдээ хэрхэн нууцлагдаж байсантай адилхан нууц байв. Одоо ч давж заалдах эрхээсээ сайн дураараа татгалзсан буруутан “нууц” хэвээр л байгаа. Давж заалдах эрхээсээ татгалзсаар хуулийн хугацаа дуусгасан нь ил болох мөчид Лондоны Арбитрын шүүх 51 сая доллар байршуулсан тохиолдолд ийм эрх өгнө гэсэн хэмээх бас нэгэн эзэнгүй яриа нийгмэд түгээж “Эрдэнэт ямар юмаараа тийм их мөнгө дансанд байршуулж чадах вэ дээ. Тэгээд л хугацаа дуусгасан” гэсэн зөвшөөрүүлэх тактик хэрэглэж эхэлсэн. Лондоны Арбиртрын шүүх санхүүгийн чадавхиа баталчихвал тэр мөнгийг байршуулахгүйгээр давж заалдаж болохыг журамлачихсан байсаар байтал шүү. Ингээд л эрхээсээ татгалзсанаар “Эрдэнэт” өр төлбөр төлөх гарцаагүй байдалд орсон.

Хамгийн ноцтой нь энэ хэрэг Арбитрын шүүхээр шийдээд явах ч асуудал биш байсан гэдэг. Энэ нь гарын үсэг хуурамчаар үйлдсэн эрүүгийн гэмт хэрэг байсан ч мөн л хэн ч юм энэ хэргийг Арбирт руу хөтөлсөн. “Жаст”-ын Ш.Батхүү гарын үсгийг хуурамчаар үйлдэн “Стандарт” банкаас зээл авсан гэдэг баримт уг нь байдаг ч мөн л энэ баримтыг нуун дарагдуулснаар “Эрдэнэт” Арбитрын шийдвэрээр “Стандарт”-д мөнгө төлөхөөр болоод байгаа билээ. Хуурамчаар гарын үсэг зурсан нь нотлогдвол энэ хэрэгт “Эрдэнэт” мөнгө төлөх бус эрүүгийн хэрэг болох юм. Тодруулбал, “Стандарт” банкинд “Эрдэнэт” мөнгө төлөхгүй байх боломж нь байгаа ажээ.

С.Нацаг