Тэгэхээр байна ш дээ хө, өнөөх Г.Занданшатар чинь дахиад л хуулийн будлиан тарьж яваа бололтой. Уг нь УИХ-ын баталсан хуулийг биелүүлэх нь, Засгийн газрын шийдвэрийг хуулийн дагуу гаргах нь энэ сайдтай шууд холбогдоно. Тэр бол ЗГХЭГ-ыг толгойлж буй Төрийн сайд хүн. Гэтэл Зам, тээврийн хөгжлийн сайд Ж.Бат-Эрдэнэ өргөдлөө өгснөөс хойш энэ хүний хуулийг гуйвуулж буй үйлдлүүд тасрахаа байлаа. “Зууны мэдээ” сонинд анхлан энэ талаар хөндөж, Засгийн газрын Хэвлэл, мэдээллийн алба хариу няцаасан “МЭДЭГДЭЛ” хийчихээд тэр дор нь сайтаасаа устгаж байсан нь саяхны үйлдэл. Энэхүү мэдэгдлийг нэхэн санавал, Үндсэн хуульд заасны дагуу Ерөнхий сайд У.Хүрэлсүх Зам, тээврийн хөгжлийн сайд Ж.Бат-Эрдэнийг чөлөөлөх асуудлаар Ерөнхийлөгчтэй зөвшилцөх бичгээ хүргүүлчихсэн, хариу хүлээж байгаа гэсэн агуулгатай байсан юмдаг. Эндээс л эрхэм сайд Г.Занданшатарын хуулийг “жонхууруулсан” удаахь будлиан эхэлсэн бололтой юм. Монгол Улсын Үндсэн хуулийн 39 дүгээр зүйлд ингэж заасан байдаг аж.

Гучин есдүгээр зүйл.

2. Монгол Улсын Ерөнхий сайд Засгийн газрын бүтэц, бүрэлдэхүүн, түүнд өөрчлөлт оруулах саналаа Ерөнхийлөгчтэй зөвшилцөн УИХ-д өргөн мэдүүлнэ. Ерөнхий сайд уул асуудлыг Ерөнхийлөгчтэй долоо хоногийн дотор зөвшилцөж чадаагүй бол УИХ-д өөрөө өргөн мэдүүлнэ.

Үндсэн хуулийн дээрх заалтын дагуу бол Засгийн газар 2018 оны наймдугаар сарын 12-нд хуралдаж, Зам, тээврийн хөгжлийн сайд Ж.Бат-Эрдэнийг үүрэгт ажлаас нь чөлөөлөх болсныг Ерөнхий сайд У.Хүрэлсүх мэдэгдсэн. Наймдугаар сарын 12 бол амралтын өдөр. Амралтын өдөр хүн ажлаас чөлөөлж болдог ч юм уу, үгүй ч юм уу. Энэ бол тусдаа асуудал. Ямар боловч Засгийн газраас Ерөнхийлөгч рүү бичгээ явуулж, зөвшилцөх хариуг нь хүлээсэн болж таарах нь. Ямар зөвшилцсөн хариу өгөх нь Төрийн тэргүүний эрх, мэдэл байх. Өгөхгүй байх ч боломжтой гэдгийг Үндсэн хуулийн дээрх заалтаас харж болохоор байна.  Харин ямар нэгэн хариу өгсөн, эс өгснөөс үл хамаарч 7 хоногийн дотор зөвшилцөж чадаагүй бол Зам, тээврийн хөгжлийн сайд Ж.Бат-Эрдэнийг чөлөөлөх асуудлыг УИХ-д оруулах нь Үндсэн хуулиар хүлээсэн Ерөнхий сайдын үүрэг юм байна. Гэтэл наймдугаар сард налайж, есдүгээр сар дуусч, одоо аравдугаар сар гарчихаад байхад л сая нэг юм энэ асуудал хөндөгдөж байна. “Буцах эхнэрт үнээ, тугал нийлэх хамаагүй” мэт хүнтэйгээр Зам, тээврийн хөгжлийн салбарыг бараг хоёр сар болгочихоод байгаа нь ЗГХЭГ-ын даргатай ямар нэгэн сэжмээр холбогдож байна. Тэр бол Ерөнхий сайдын түшиц нь болж, гаргах шийдвэрт нь хуулийн болон бусад зөвлөгөөг өгч ажиллах ёстой хүн билээ.

О.Балдан-Очир